गोरखा, १ फागुन । गण्डकी गाउँपालिकामा रहेका चेपाङ समुदायका विपन्न नागरिकलाई जीविकोपार्जन सहयोगको लागि उन्नत जातका बाख्रा तथा बोका वितरण गरिएको छ ।
चेपाङ समुदायको आर्थिक अवस्था सुधारका लागि वडा नम्बर ७ मा रहेका चेपाङ समुदायका विपन्न बाख्रा पालन गर्ने किसान छनौट गरी बाख्रा र उन्नत जाताको व्याडबोका वितरण गरेको हो ।
त्यस्तै किसानहरुलाई बाख्रा पालन तथा गोठ व्यवस्थापन तालिम समेत प्रदान गरेको छ । तालिमपछि ५८ जनालाई बाख्रा तथा ४ जनालाई ब्याडको बोका वितरण गरेको हो ।
तारा नमस्ते फाउण्डेसनले गोठ सुधारका लागि जस्तापाता र जाली उपलब्ध गराएको स्थानीय सितामाया चेपाङको भनाई छ । अहिले बाख्रा पाउने ५८ जना मूल समुहकबाट अर्को वर्ष उपहार समुहका सदस्य ५८ जनालाई उनीहरुले पाठी उपहार दिनेछन्् । बाख्रामा नश्ल सुधारका लागि ४ टोलमा ४ वटा बोयर जातको बोका समेत बितरण गरेको तारा नमस्ते फाउण्डेसनका कार्यक्रम व्यवस्थापक राजन पुडासैनीले जानकारी दिनुभयो ।
फाउण्डेसनले गण्डकी गाउँपालिका–७ को लामिडाडा, सल्लेरी, भक्केडाडा, खरेटार, बदला, क्षेत्रीखोला, ७ को कौदी खोलामा पोषणयुक्त घाँस रोपण, बाख्रा तथा स्थानीय नागरिकको स्वास्थ्य बीमा कार्यक्रम लागू गर्ने पुडासैनीले जानकारी दिनुभयो । फाउण्डेसन मार्फत बोयर जातको उन्नत बोका पाएपछि खुशी लागेको स्थानीय गुमानसिं चेपाङले बताउनुभयो ।
स्थानीयको माग अनुरुप चेपाङ बस्तीका बिपन्न महिलाहरूको आयआर्जनका लागि बाख्रा बितरण कार्यक्रम भएको र कुखुरा बितरणको कार्यक्रम पनि छिटै गरिने तारा नेपाल फाउण्डेसनका अध्यक्ष ईश्वर श्रेष्ठले जानकारी दिनुभयो ।
