गोरखा, १ फागु्न । गोरखाको स्थानमा देखिएको ‘अफ्रिकन स्वाइन फिभर’ को सङ्क्रमण १ दर्जनभन्दा बढी बंगुर मरेको छ । गोरखा नगरपालिको २ स्थानमा देखिएको उक्त रोगबाट हालसम्म ठुलासाना गरी १५ वटा बंगुर मरेको भेटेरीनरी अस्पताल तथा पशु बिज्ञ केन्द्र गोरखाका सूचना अधिकारी टिकाबहादुर नेपालीले बताउनुभयो ।
उहाँका अनुसार गोरखा नगरपालिका–५ तथा ९ को लक्ष्मी बजारमा ‘अफ्रिकन स्वाइन फिभर’ को सङ्क्रमण उक्त संख्यामा बंगुर मरेको हो । ‘दुई स्थानमा गरी अहिलेसम्म ठुलासाना गरी १५ वटा मरेको छ’ उहाँले भन्नुभयो ‘जिल्लामा पहिलो पटक दुई हप्ता अगाडी लक्ष्मी बजारको पिपलबोट क्षेत्रमा देखिएको थियो ।’
२ साताको बिचमा नै दुई स्थानमा देखिएको बंगुरहरु मरेका थिए । लक्ष्मी बजार क्षेत्रको बंगुरको ल्याव टेष्ट पछी पुष्टी भएको थियो भने वडा नम्बर ५ को भने किट टेष्टमा पोजेटिभ देखिएको सूचना अधिकारी नेपालीले जानकारी दिनुभाये ।
सुँगुर, बंगुर तथा बँदेलमा लाग्ने यो रोगको निगरानीकै क्रममा गोरखा सहित कास्की, तनहुँ र लमजुङमा सङ्क्रमण पुष्टि भएको पशुपक्षी तथा मत्स्य विकास निर्देशनालय पोखराले जनाएको छ । पछिल्लो सङ्क्रमणबाट कास्कीमा ५५, तनहुँमा ३०, लमजुङमा १४ र गोरखामा १५ गरी ११४ बंगुर मरेको छ ।
सङ्क्रमण फैलिँदै जाँदा ठूला÷साना बङ्गुर फार्ममा जैविक सुरक्षाका विधि अवलम्बन गर्न किसानलाई आग्रह गरिएको निर्देशनालयका महानिर्देशक डा।प्रेरणा सेढाईँ भट्टराईले बताए । त्यसैगरी विभिन्न सचेतनाका कार्यक्रम र पशुजन्य ओसारपसारमा निगरानी बढाइएको छ ।
अफ्रिकन स्वाइन फिभर सङ्क्रामक रोग हो । अहिलेसम्म यसको रोकथाम तथा न्यूनीकरणका लागि खोप उपलब्ध छैन । गण्डकी प्रदेशमा गएको वर्ष साउन २९ गते पहिलोपटक सङ्क्रमण पुष्टि भएको थियो । निर्देशनालयका वरिष्ठ पशु विकास अधिकृत डा.बालकुमार श्रेष्ठले रोगका कारण किसानले झण्डै ५० करोड रुपैयाँ बराबरको आर्थिक क्षति भोग्नुपरेको छ ।
सुँगुर, बंगुर र बदेलमा लाग्ने अफ्रिकन स्वाइन फिभर रोग रोगी सुँगुर, बंगुर वा बँदेल प्रजातिको सम्पर्कबाट ती प्रजातिका पशुमा फैलिने गर्छ । पशु स्वास्थ्य अधिकृत सुरेश श्रेष्ठका अनुसार रोगको सङ्क्रमण हुँदा पशुमा उच्च ज्वरो आउने, शरीरमा निलो धब्बा देखिने, छेर्ने, बान्ता गर्ने, झुम्मिएर एकै ठाउँमा बस्नेजस्ता लक्षण देखिने गर्छ ।
