गोरखा ५ कार्तिक । भुकम्पमा परेर गोरखामा आज एकजना गम्भीर घाइते भएका छन् । भुकम्पमा परेर गोरखा नगरपालिका–३, नारेश्वर भौटेनीकी ३० बर्षकी ससुरी थापा घाइते हुनुभएको जिल्ला प्रहरी कार्यालय गोरखा सूचना अधिकारी प्रहरी नायव उपरीक्षक डिएसपी रमेशकुमार श्रेष्ठले जानकारी दिनुभयो ।
नवरात्री अन्तर्गत अस्टमी पुजाको तयारीका लागि बिहान घरको दोस्रो तल्लामा पुजाको थालीहरु माझिरहेको बेला भुकम्प गएपछि थापा दुई तल्ला माथी छतबाट हाम फाल्नु भएको थियो ।
घाइते थापाको गोरखा अस्पतालमा प्राथमिक उपचारपछि थप उपचारका लागि चितवन स्थित पुरानो मेडिकल कलेज पठाइएको उहाँले जानकारी दिनुभयो ।
थापाको बायाँ खुट्टा भाँचिएको र ढाँडमा गम्भीर चोट देखिएपछि चितवन रिफर गरिएको गोरखा अस्पतालले जनाएको छ ।
आज बिहान ७ बजेर ३९ मिनेटमा धादिङको खरी केन्द्रबिन्दु भएर ६ दशमलव १ रेक्टर स्केलको भुकम्प गएको थियो । भुकम्पले गोरखाको सहिदलखन, भिमसेन थापा र गण्डकी गाउँपालिका भित्रका दर्जनौं पुराना माटोका घरहरु चर्किएको छ । क्षती विवरण सकलन गर्ने काम भईरहेको डिएसपी श्रेष्ठको भनाइ छ ।
भुकम्पको लगातारको पराकम्पले मानिसहरु त्रसित भएका छन् ।
