गोरखा, २६ असोज । गोरखाको शहिद लखन गाउँपालिका–३ को कोटेगाँउमा गएको असारमा भएको जीप दुर्घटनामा ज्यान गुमाएका व्यक्तिका परिवारलाई भुक्तानी गर्ने गरी २० लाख रुपैयाको चेक हस्तान्तरण भएको छ ।
शिखर ईन्स्योरेन्सले जिल्ला प्रशासन कार्यालय गोरखालाई उक्त रकमको चेक हस्तान्तरण गरेको आँबुखैरेनी शाखाका प्रबन्धक ईमान सिं बानियाँले जानकारी दिनुभयो । असार ८ गते पातले खोलामा दुलही लिएर फर्कदै गरेको जिप दुर्घटना हुँदा ५ जनाको घटनास्थलमै मृत्यु भएको थियो ।
दुर्घटनामा प्रदेश ३–०१–०२३ च २४२७ नम्बरको योद्वा जिप दुर्घटना हुँदा स्थानीयबासी निरज थापा, प्रविण भनिने रोहित थापा, विरबहादुर थापा, नविना थापा र थानबहादुर थापाको मृत्यु भएको थियो । दुर्घटनामा ज्यान गुमाएका व्यक्तिको परिवारलाई उपलब्ध गराउन कम्पनीले प्रसासनलाई चेक उपलब्ध गराएको हो ।
प्रबन्धक बानियाँका अनुसार राष्ट्रिय बाणिज्य बैंक लिमिटेड सिप्रदी हायर पर्चेज प्रा.लि.को नाममा रहेको उक्त सवारी दुर्घटना हुँदा नियमानुसार पाउनु पर्ने रकम प्रशासनको नाममा चेक हस्तान्तरण गरिएको जानकारी दिनुभयो ।
