गोरखा, २८ साउन : गोरखाको गण्डकी गाउँपालिका–६,भुम्लिचोक स्थित पल्लोटारमा फेला परेको अजिङ्गर शनिवार चितवनमा लगेर सुरक्षित बासस्थानमा छोडिएको छ । सव डिभिजिन बन कार्यालय सिउरेनीटारका प्रमुख बनअधिकृत रविआन्नद गोपालीले सहितको वन कार्यालयका कर्मचारीको टोली चितवन स्थित राष्ट्रिय प्राकृतिक संरक्षण कोषमा लगेर छोडेको हो ।
फेला पारिएको क्षेत्रमा सुरक्षित बासस्थान नभेटिएपछि चितवनमा लगेर सुरक्षिता वासस्थानमा छोडिएको वनअधिकृत गोपालीले जानकारी दिनुभयो । गण्डकी गाउँपालिकाको भुम्लिचोक र चितवनको इच्छाकामना गाउँपालिका फिस्लिङ जोड्ने नयाँ बनेको मोटरेवल पुल नजिकै शुक्रबार गोरखा तर्फको कच्ची सडकमा अजिङ्गर फेला परेको थियो ।
तीनवटा घिस्रने जनावर मध्येमा उद्धार गरिएको अजिङ्गर एक प्रजातीको भएको वनअधिकृत गोपालीले बताउनुभयो । अजिङ्गर संरक्षित प्रजतीको घस्रने जनावर अन्र्तगत हो । अजिङ्गरलाई उद्धार गरी गएराती भने सव डिभिजन कार्यालय सिउरेनीटारमा नै राखिएको थियो ।
उहाँले फेला परेको अजिङ्गर रैथाने हो वा बाढीले बगाएर ल्याएको भन्ने बारेमा यकिन गर्न कठिन भएको बताउनुभयो । बनअधिकृत गोपाली र बनरक्षक अम्बिका शर्माले लौरो र बोराको साहायताले फेला परेको अजिङ्गरको उद्धार गर्नुभएको हो । स्थानीयबासीहरुले पहिलो पटक आफुले त्यस क्षेत्रमा अजिङ्गर फेला परेको बताएका छन् ।
