गोरखा, २६ साउन । केही दिन यता गोरखा सदरमुकाममा आँखा पाक्ने रोग फैलिए संगै सरदमुकाममा रहेको एक नीजि बिद्यालयको पठनपाठन बन्द गरिएको छ । अधिकाशं बिद्यार्थीहरुमा रोग फैलिएको भन्दै गोरखा नगरपालिका–८ को रानिबन क्षेत्रमा सञ्चालित द ओल्ड क्यापिटल माविले केही दिनको लागि पठनपाठन बन्द गरिएको हो ।
बिद्यालयले आज एक सूचना जारी गर्दै ‘बिद्यालयमा अध्ययनरत अधिकांश बिद्यार्थी भाईबहिनीहरुमा आँखा पाक्ने सरुवा रोगको संक्रमण तीब्र रुपमा फैलिरहेको हुनाले थप संक्रमण फैलन नदिन, संक्रमणको चक्रलाई टुटाउन र शिक्षक बिद्यार्थीहरुको स्वास्थ्यलाई मध्य नगर गर्दै’ केही दिनका लागि पठनपाठन बन्द गरिएको बिद्यालय प्रशासनले जनाएको छ ।
बिद्यालयले आज जारी गरेको सूचना अनुसार अब आउदो मंगलबार मात्र खुल्ने छ ।
करिब २ हजार १०० बिद्यार्थीहरु अध्ययरत रहेको उक्त बिद्यालयमा अहिलेसम्म ३०० जनाभन्दा बढी बिद्यार्थी र केही शिक्षकमा आँखा पाक्ने रोग देखिएको प्रिन्सीपल जनक केसीले जानकारी दिनुभयो । उहाँका अनुसार बिद्यालयको कक्षा ६ र ९ मा अध्ययनरत बिद्यार्थीहरुमा बढी संक्रमण देखिएको हो ।
बिद्यार्थीहरुमा संक्रमण देखिए पछि अन्य बिद्यार्थीहरुलाई अभिभावकहरुले अध्ययन गर्न पठाउन बन्द गरेका कारण पनि केही दिनको लागि पठनपाठन बन्द गरिएको प्रिन्सीपल केसीले बताउनुभएको छ ।
