गोरखा, २५ साउन । गोरखा नगरपालिका–७, सतिपिपलबाट बरामद गरी विशेष सुरक्षाका साथ जिल्ला प्रहरी कार्यालयमा राखिएको टल्कने ढुङ्गा ‘क्वार्ज क्रिष्टल’ भएको खानी तथा भूगर्भ विभागले पुष्टि गरेको छ । विभागबाट गोरखा आएको भूगर्भविद्हरुको टोलीले दुईदिन लगायर गरेको परीक्षणबाट उक्त टल्कने ढुङ्गा ‘क्वार्ज क्रिष्टल’ नै भएको पुष्टी गरेको हो ।
ढुङ्गाको परीक्षण गरी विभागको टोलीले जिल्ला प्रसासन कार्यालय गोरखालाई परीक्षण प्रतिवदेन बुझाएको भूगर्भविद् डा.सुस्मिता भण्डारीले जानकारी दिनुभयो । ‘परीक्षणबाट उक्त ढुङ्गा महत्वपूर्ण र बहुमुल्य रत्नपत्थर (क्वार्ज क्रिष्टल) भएको पाइयो, उहाँले भन्नुभयो, ‘संसारभरका धातुलाई कडापनका आधारमा १० भागमा वर्गीकरण गरिन्छ, सोही आधारमा बरामद गरिएको ढुङ्गा ७ औं नम्बरमा पर्छ ।’
भूगर्भविद्को टोलीले टल्कने ढुङ्गाको नापतौल लिनुका साथै अन्य विभिन्न प्राविधिक पक्षबारे पनि परीक्षण गरेको भूगर्भविद् डा.भण्डारीले जानकारी दिनुभयो । कडापनका आधारमा हिरा १० औं नम्वरमा पर्ने उहाँको भनाई छ । टोलीले गरेको परीक्षणका क्रममा उक्त ढुङ्गाको तौल ५२ किलो ३ सय ३० ग्राम रहेको पाइएको छ । यत्ति ठूलो तौलको भएको एउटै चट्टानका भेटाउन समेत गाह्रो पर्ने भूगर्भविद् डा.भण्डारीले बताउनुभयो ।
‘क्वार्ज क्रिष्टल’ मुख्य रुपमा सजावटका सामग्री तथा गरगहना बनाउन प्रयोग हुने गरेको भूगर्भविद् डा.भण्डारीको भनाई छ । त्यस्तै रेडियो ट्रान्समिटर, कम्प्युटर, घडी लगायतका अन्य विद्युतिय उपकरणहरुमा पनि क्वार्ज क्रिष्टलको आंशिक रुपमा प्रयोग हुने उहाँले जानकारी दिनुभयो ।
टल्कने ढुङ्गाको परीक्षण सम्पन्न गरेपछि विभागको टोलीले बुधबार जिल्ला प्रशासन कार्यालयमा गोरखा नगरपालिकाका प्रमुख कृष्णबहादुर राना, प्रमुख जिल्ला अधिकारी दिनेशसागर भुसाल र प्रहरी उपरीक्षक (एसपी) अनुपम श्रेष्ठलाई परीक्षणपछिको अध्ययन प्रतिवेदन बुझाएको हो । जिल्ला प्रसासन कार्यालय गोरखाले टल्कने ढुङ्गाको नमुना परीक्षणका लागि खानी तथा भूगर्भ विभागलाई पत्राचार गरेपछि विभागले भूगर्भविद् डा. भण्डारी र दुर्गा बोलाखेको टोली गोरखा पठाएको थियो ।
अध्ययन टोलीले बरामद गरिएको ‘क्वार्ज क्रिष्टल’ खानी तथा भूगर्भ विभागलाई उपलब्ध गराउन पनि प्रतिवेदन मार्फत सुझाव दिएको छ । खानी तथा खनिज पदार्थ ऐन २०४२ को दफा २५ को उपदफा १ अनुसार खनिज कार्यगर्ने अनुमति नलिई उत्खनन् तथा संकलन गरिएकाले उक्त पत्थर विभागलाई उपलब्ध गराई सहयोग गर्न पत्र माफृत आग्रह गरिएको छ ।
गएको असार १४ गते प्रहरीले उक्त टल्कने ढुङ्गा सतिपिपल स्थित स्थानीयबासी राममाया शाहीको घरबाट बरामद गरेको थियो । टल्कने ढुङ्गा बर्षौदेखि शाही परिवारले घरमा राखेर पुजा गर्दै आएको पाइएकाले उक्त ढुङगा गोरखकाली मन्दिर या गोरखनाथ मन्दिर परिषर्मा राख्न गोरखाका विभिन्न संघसंस्थाहरुले प्रसासनसंग माग गर्दै आएका छन् ।
टल्कने ढुङ्गा ऐतिहासिक महत्वको भएको हुनसक्ने भन्दै गोरखा दरवार परिसरमा प्रणप्रतिष्ठा गरी ब्यबस्थापन गनुपर्नेमा संघसंस्थाहरुको जोड छ । पुजाआजा र धर्मकर्ममा प्रयोग गरिरहेको बल्ने शिला कुनै पनि वहानामा गोरखा जिल्ला बाहिर नपठाई मुलधनीको ईच्छा अनुसार गोरखकाली र गोरखनाथको पबित्र भूमिमा राख्नुपर्ने स्थानीयबासीहरुको पनि भनाई रहेको छ ।
गोरखा नगरपालिका गोरखाका नगरप्रमुख कृष्णबहादुर रानामगरले विभागको टोलीसँगको भेटमा ऐतिहासिक र धार्मिक हिसावले उक्त पत्थरलाई गोरखामै राख्ने व्यवस्था मिलाउन आग्रह गर्नुभयो । उहाँले टल्कने ढुङगा गोरखामा राख्नका लागि नगरपालिकाले नेपाल सरकार लगायतका अन्य सम्वन्धित निकायहरुसंग आवश्यक समन्वय गर्ने समेत बताउनु भएको छ ।
