गोरखा, ११ जेठ । रोटरी क्लब अफ बज्र मनासलुको भवन निर्माणका लागि गोरखाका एक दम्पतीले जग्गा दान गरेका छन् । गोरखा नगरपालिका –७ नयाँ बजार निवासी बिनोद र उहाँकी श्रीमती ज्ञानु अर्यालले रोटरी क्लबको भवन निर्माणका लागि जग्गा दान गर्नु भएको रोटरी क्लब अफ बज्र मनासलुका अध्यक्ष रामकुमार श्रेष्ठले जानकारी दिनुभयो ।
नयाँ बजार क्षेत्रमा मेडिकल सञ्चालन गर्दै आउनु भएका अर्याल दम्पतीले भवन निर्माणका लागि गोरखा नगरपालिका–७ को डण्डीडाडाँ क्षेत्रमा रहेको ३ आना जग्गा दान गर्नु भएको उहाँले बताउनुभयो ।
भवन निर्माणकोलागि संस्था भित्रैका सदस्यबाट १५ लाख बरावरको रकम संकलन हुने भएको छ । बजार क्षेत्रको उक्त जग्गा हालको मुल्यमा १५ लाख मुल्य बरावरको रहेको छ । भवन निर्माणका लागि हाल गोरखा नगरपालिकाले ५ लाख अनुदान दिएको रोटरी क्लब अफ बज्र मनासलुले जनाएको छ । अर्याल रोटरी क्लब अफ बज्र मनासलुका उपाध्यक्ष समेत हुनुहुन्छ ।
