गोरखा, १ जेठ । भिमसेन थापा गाउँपालिका भित्रका जनप्रतिनिधि र कर्मचारीले आफ्ना बालबालिकालाई सामुदायिक विद्यलयमा भर्ना गराउनु पर्ने निर्णय गरेको छ । गाँउपालिकाले आज एक सूचना जारी गर्दै सार्वजनिक पद धारण गरेका सबै पदाधिकारीहरुले आफ्ना बालबालिकालाई सामुदायिक विद्यालयमा अनिवार्य भर्ना गराउनु पर्ने निर्णय गरिएको जनाएको छ ।
गाउँपालिका भित्र रहेका सामुदायिक विद्यालयहरुलाई थप व्यवस्थित र प्रभावकारी बनाई गुणस्तरीय शिक्षा सुनिश्चितता गर्न सहयोग पुर्याउने उद्धेश्यले यस्तो निर्णय गरिएको गाँउपालिका अध्यक्ष लोक प्रसाद बञ्जाराले जानकारी दिनुभयो । गाउँ कार्यपालिकाबाट सार्वजनिक पद धारण गरेका जनप्रतिनिधि, कर्मचारी, शिक्षक, विद्यालय व्यवस्थापन समितिका पदाधिकारी र शिक्षक अभिभावक संघका पदाधिकारीहरुका बालवालिकालाई सामुदायिक विद्यालयमा भर्ना गराउने निर्णय गरिएको उहाँले बताउनुभयो ।
जनप्रतिनिधि र कर्मचारीले अनिवार्य रुपमा आफ्ना बाबुनानीहरुलाई सामुदायिक विद्यालयमा भर्ना गराई गाउँपालिकाको शिक्षालाई बालमैत्री, गुणस्तरिय, प्रतिस्पर्धी एवं नतिजामुलक बनाउन सहयोग गरिदिन गाँउपालिका अध्यक्ष बञ्जाराले आग्रह गर्नुभयो । आफ्ना बालबालिकाहरुलाई सामुदायिक विद्यालयमा भर्ना गराएको जानकारी गाँउपालिकाको शिक्षा, युवा तथा खेलकुद शाखामा उपलब्ध गराउनु पर्ने प्रमुख प्रशासकिय अधिकृत चित्र बहादर अधिकारीले बताउनुभयो ।
शाखाको निर्णय कार्यान्वयनका लागि सम्वन्धित सबै पक्षसँग समन्वय, सहजीकरण गरी प्रभावकारी रुपमा अनुगमन हुने उहाँको भनाई छ । यसअघि अजिकोट गाँउपालिकाको गाँउ कार्यपालिकाकाको बैठकले पनि सार्वजनिक पद धारण गरेका सबैले आफ्नो बालबालिका सामुदायिक विद्यलयमा पढाउनु पर्ने निणर्य गरिसकेको छ ।
