गोरखा, २९ वैशाख । गोरखामा आफैले काटेको रुखको हाँगाले लागेर एक जना गम्भीर घाइते भएको छ । रुख काट्ने क्रममा हाँगाले लागेर गम्भिर घाइते भई अर्ध बेहोस हुनु भएका अजिरकोट गाँउपालिका ३ काफलडाँडा निवासी राजेन्द्र अधिकारीको हेलीकप्टर मार्फत उद्धार गरी उपचारको लागि काठमाडौं लागिएको गाँउपालिकाकी उपाध्यक्ष अनिता भुजेलले जानकारी दिनुभयो ।
उहाँका अनुसार ३५ वर्षिय अधिकारीको टाँउकोमा गम्भीर चोट लागेको छ । ‘ उहाँ र गाँउकै अर्को एक जना मिलेर रुख काट्न जानु भाको रहेछ सोही क्रममा हाँगाले टाँउकोमा लागेर घाइते हुनुभ्एको हो ’ उहाँले भन्नुभयो ।अधिकारीसँगै स्थानीय प्रकाश अधिकारी पनि रुख काट्न जानु भएको थियो ।
गाँउपालिकाको पहलमा गृह मन्त्रालय र रक्षा मन्त्रालयसँग समन्वय गरेर नेपाली सेनाको हेलिकप्टर मार्फत उद्धार गरी उपचारका लागि लागिएको हो । स्रोतलाई उदृत गर्दै हाल अधिकारीको उपचार जारी रहेको उहाँले बताउनुभयो ।
