गोरखा, १३ वैशाख । गोरखामा जबरजस्ती करणीको शिकार भएका मध्य ७५ प्रतिशत नाबालिक रहेको पाएको छ । आर्थिक वर्ष २०७९/०८० को साउन देखि चैत मसान्त सम्ममा १६ जना महिला बलात्कारको शिकार बनेको जिल्ला प्रहरी कार्यालय गोरखाको तथ्याङ्कले जनाएको छ ।
जसमध्ये १२ जना नाबालिक रहेको जिल्ला प्रहरी कार्यालय गोरखाका प्रहरी नायव उपरीक्षक एबं सूचना अधिकारी लिलाराज लामिछानेले जानकारी दिनुभयो । यी १२ जना नै १८ वर्ष भन्दा मुनीको रहेका छन् । बाँकी चार जना ( २५ प्रतिशत) १८ वर्ष माथीका रहेका हुन् । उहाँका अनुसार १८ वर्ष देखि ३५ वर्ष उमेर समूहका दुई जना र त्यस भन्दा माथी ६० वर्ष उमेर समूहका थप दुई जना जबरजस्ती करणीको शिकार बनेको बताउनुभयो ।
जबरजस्ती करणीका अधिकाशं अभियुक्त १८ देखि ३५ वर्ष वीचका रहेको जिल्ला प्रहरी कार्यालय गोरखाले जानकारी दिएको छ ।आर्थिक वर्ष २०७७/०७८ मा २८ वटा जबरजस्ती करणीका घटना भएका थिए भने २०७८/०७९ मा घटेर २० मा झरेको थियो । पछिल्लो केही वर्ष यताको तथ्याङ्क हेर्दा जिल्लामा बलत्कार र बलत्कारजन्य घटना घट्दै गए पनि बालबालिका तथा किशोरीहरुमा भने बलात्कृत हुने क्रम उच्च देखिएको छ ।
यती धेरै मात्रमा नाबालिक जबरजस्ती करणीको शिकार बन्नु समाजको लागी एउटा गम्भिर चिन्ताको विषय हो । यस समस्याको समाधानको लागी सरोकारवाला, जनप्रतिनिधी, समाजका बृद्धिजीवि वर्ग लाग्नु पर्ने देखिएको छ । परिवार, आफन्त र नजिकका संरक्षकहरुबाट साना नानीहरु बलात्कार एवं यौनजन्य अपराधका शिकार हुने गरेको डिएसपी लामिछानेको भनाइ छ ।
