गोरखा, ६ बैशाख (रासस) । उत्तरी गोरखाको चुमनुव्री गाँउपालिकामा आजदेखि ‘चुम शताब्दी श्याग्या महोत्सब २०८०’ सुरु भएको छ । ‘अहिंसा अभियान, चुमबासीको पहिचान’ भन्ने नाराका साथ प्रकृति र संस्कृतिको संरक्षणका लागि महोत्सवको सुरु भएको चुम शताब्दी श्याग्या महोत्सव २०८० मूल समारोह समितिका अध्यक्ष तथा चुमनुव्री गाउँपालिका अध्यक्ष निमा लामाले जानकारी दिनुभयो ।
चुमनुब्री गाउँपालिका–७ छेकम्पार स्थित राजेन गुम्बामा सुरु भएको महोत्सवको एक कार्यक्रममा विच प्रधानमन्त्री पुष्पकमल दाहाल (प्रचण्ड) ले आज उद्घाटन गर्नुभएको हो । प्रधानमन्त्री दाहाल महोत्सव उद्घाटनका लागि हेलिकप्टर चढेर उत्तरी गोरखा पुग्नु भएको हो । चुम क्षेत्रको चिनारी, निरन्तरता, प्रचार–प्रसार तथा जैविक विविधता संरक्षणमा योगदान पु¥याउने उद्देश्यका साथ आयोजना भएको महोत्सव ३ दिनसम्म सञ्चालन हुने अध्यक्ष लामाले जानकारी दिनुभयो ।
बि.स १९७७ को वुद्धजयन्ती अवसरमा अवतारी लामा सेराप दोर्जेले आफ्नो तपोभूमि चुम उपत्यकाका बासिन्दालाई अहिंसात्मक सिद्धान्तको पालना गर्ने गरि सामुहिक प्रतिवद्धता गराउनु भएको र त्यस समयदेखि नै चुमवासीले चुम उपत्यकालाई अहिंसात्मक क्षेत्र घोषणा गरेका थिए । अहिंसा क्षेत्र भएकाले त्यहाँ कुनै प्रकारको काटमार हुदैन । महोत्सबले चुमबासीहरुको सामाजिक साँस्कृतिक एकतालाई थप मजबुत बनाउनुका साथै प्राकृतिक तथा संस्कृति संरक्षणमा सहयोग पुु¥याउने र सामूहिक प्रतिवद्धतालाई अझ बलियो बनाउने बिश्वास व्यक्त अध्यक्ष लामाको छ ।
महोत्सवमा शान्तिदिप प्रज्वलन, र चुम उपत्यका स्थानीय समुदायद्धारा हस्ताक्षर गरी अहिंसा क्षेत्रलाई निरन्तरताका लागि प्रतिबद्धता जनाउने कार्यक्रम रहेको अध्यक्ष लामाले जानकारी दिनुभयो । भोली बैशाख ७ गते दोस्रो दिन शान्तिको पदयात्रा, धर्म गुरुबाट क्षमापूजा, बौद्धका प्रवचन र साँस्कृतिक कार्यक्रम हुने उहाँको भनाई छ ।
महोत्सवकै अवसरमा सो क्षेत्रमा वृक्षारोपण गर्ने, पर्सी बैशाख ८ गते प्रकृती र संस्कृति संरक्षण गरि प्रमुख लब्राङ लामावाट ऐतिहासिक नाराक छ्याम् लाखे नाँच प्रर्दशनी सहित स्थानीय र परम्परागत खेलकुद कार्यक्रम सञ्चालन हुने अध्यक्ष लामाले बताउनुभयो । त्यस्तै महोत्सवको अन्तिम दिन बैशाख ९ गते परम्परागत घोडेजात्रा, स्थानीय सँस्कृति कार्यक्रमहरुको प्रर्दशनी गरी चुम श्याग्या शताब्दी महोत्सबको समापन गरिने उहाँको भनाई छ ।
मेलामा पालिका भन्दा बाहिरबाट एक हजारबढी महोत्सव अवलोकनका लागि चुमउपत्यका पुग्ने आयोजकले अपेक्षा गरेको छ । पर्यटक आउजाउ गरिरहने क्षेत्र भएकाले महोत्सवका हेर्न आउनेहरुका लागि खान र बस्न होटलको राम्रो सुविधा रहेको आयोजकले जनाएको छ । होटलमा बास नपुगे खानपान र बासस्थानका लागि होमस्टेको राम्रो ब्यबस्था रहेको उहाँले बताउनुभयो ।
महोत्सव सम्पन्न गर्न लागि करिब १ करोड ५० लाख रुपैया खर्च लाग्ने अनुमान गरिएको छ । अहिलेसम्म करिब ४५ लाख रुपैया संकलन गरिएको मूल समारोह समितिका अध्यक्ष लामाले जानकारी दिनुभयो । चुम उपत्यकामा हरेक वर्ष करिब १५ सय भन्दाबढी विदेशी पर्यटक पुग्छन् । नेपाली पर्यटक पनि चुम उपत्यका पुग्ने क्रम पछिल्लो समय बढ्दै गएको उहाँले बताउनुभयो ।
