गोरखा, ३ बैशाख । गोरखाको पालुङटार नगरपालिकाले आगामी आर्थिक वर्ष २०८०/२०८१ को वार्षिक नीति तथा कार्यक्रम, बजेट तर्जुमा साथै भू–वर्गिकरण सम्बन्धी विज्ञहरुसंग छलफल तथा अन्तरक्रिया कार्यक्रम गरेको छ । नगरपालिकाले आगामी नीति तथा कार्यक्रम बजेट ल्याउदा जनपक्षिय र नगरपालिकाबासीको चाहाना र आबश्यकता अनुसार ल्याउनका लागि सवैपक्षसग सुझाव संकलन गरेको नगरप्रमुख बिबस चिन्तनले जानकारी दिनुभयो ।
स्थानीबासीहरुसंग पनि सुझाव लिएको नगरपालिकाले राजधानी काठमाण्डौमा पुगेर समेत नीति तथा कार्यक्रममा समेट्नु पर्ने बिषयहरुका बिषयमा सरोकारवाला तथा बिज्ञहरु छलफल गरेको उहाँले बताउनुभयो । छलफल तथा अन्तरक्रिाय कार्यक्रममा प्रतिनिधि सभा सदस्य माओवादी केन्द्र संसदिय दलका मुख्य सचेतक हितराज पाण्डेले नगरपालिकाले जग्गा वर्गिकरणको विषयमा हतारिन नहुनेमा सुझाव दिनुभयो ।
उहाँले भूगोलको अबस्था हेरेर कहाँ के गर्न सकिन्छ भन्ने टुङगो लगाएर मात्र जग्गा बर्गिकरणको थालनी उपयुक्त हुने उहाँको भनाई छ । मुख्य सचेतक पाण्डेले नेपाल कै ठूला टारहरु मध्येको टार पालुङटार भएकाले यो टारको विकास गर्न के गर्न सकिन्छ भनेर बिज्ञहरुले उपयुक्त सुझाव दिनुपर्ने आबश्कता रहेको बताउनुभयो । उहाँले मेट्रो रेलको कन्सेप्ट काठमाण्डौमा मात्र भन्दा पनि पालुङटार भित्रका टारहरुलाई समेटेर मेट्रो रेल सञ्चालन गरी पर्यटक भित्र्याउन लाग्नु पर्ने भन्दै त्यसका लागि आँफुले उपल्लो निकायमा पहल गर्ने बताउनुभएको छ ।
कार्यक्रममा गण्डकी प्रदेश सभा सदस्य सुरेन्द्रराज पाण्डेले स्वरोजगारी चाहने किसानका लागि नगरपालिकाले आबश्यक योजना निर्माण गर्न सुझाव दिनुभयो । उहाँले स्थानीय उत्पादनको बजारीकरण समस्याको रुपमा रहेको भन्दै किसानहरुले उत्पादन गरेका बस्तुलाई सजिलै बजारसम्म पु¥याउन सके उत्पादन बृद्धिमा प्रोत्साहन गर्न सकिने बताउनुभयो । छलफल तथा अन्तरक्रिया क्रार्यक्रममा पालुङटार नगरपालिकाका नगर प्रमुख विवस चिन्तनले विज्ञहरुबाट आएको सुझावलाई आत्मसाथ गर्दै कार्यान्वयन गर्ने प्रतिवद्धता व्यक्त गर्नुभयो ।
