गोरखा, १ चैत ः चेक अनादार मुद्दाका एक फरार अभियुक्तलाई प्रहरीले पक्राउ गरेको छ । गोरखा जिल्ला अदालतबाट कैद र जरिवाना फैसला तोकिएका स्याङजाको गल्याङ नगरपालिका वडा नम्बर ५ पिडिखोला स्थायी घर भएका ३४ वर्षीय सुमन श्रेष्ठ (सुवाल) लाई पक्राउ गरिएको जिल्ला प्रहरी कार्यालय गोरखाका प्रहरी नायव उपरीक्षक (डिएसपी) लिलाराज लामिछानेले जानकारी दिनुभयो ।
सुवाललाई जिल्ला अदालत गोरखाले दुई बर्ष कैद सजाय सहित जरिवानाको फैसला सुनाएको थियो । जिल्ला प्रहरी कार्यालय गोरखाको फैसला कार्यान्वयन गर्न गठित प्रहरीको एक बिशेष टोलीले उनलाई वडा प्रहरी कार्यालय वालिङ स्याङजाको सहयोगमा मंगलबार पक्राउ गरिएको हो ।
पक्राउ परेका श्रेष्ठलाई अदालतको आदेश अनुसार कैद सजाय भुक्तानीका लागि जिल्ला कारागार गोरखामा पठाइएको डिएसपी लामिछानेले जानकारी दिनुभयो ।
