गोरखा, २८ पुस । खाद्य व्यवस्था तथा व्यापार कम्पनी लिमिटेड शाखा कार्यालय गोरखामा ढुवानी अनुदानको स्टिम जिरा मसिनो चामल आईपुगेको छ । स्थानीयहरुले अत्यन्तै माग गरेको उक्त चामल भोलीदेखि कार्यालय समयमा खरिद गर्न सकिने भएको हो ।
उक्त चामल शाखा गोरखामा प्रति किलो ७० अर्थात २५ किलोको बोराको रु १७५०।– (एक हजार सात सय पचास) पर्नेछ । सोना मंसुली चामलको भाउ प्रति किलो ५२ अर्थात ३० किलोको बोराको १५६०।– (एक हजार पाँच सय साठी) पर्नेछ । कम्पनीले यस वर्ष शाखा गोरखाबाट डिपो सिर्दिबास २५२ क्विन्टल चलान गरेको छ । कम्पनीले डिपो माछाखोलामा हाल सम्म चामल पठाएको छैन ।
स्टिम जिरा मसिनो चामलको माग बढि भएको र सोना बिक्रि हुन नसकेको कारण माछाखोलामा चलान गर्न ढिला भएको कम्पनीको नि.शाखा प्रमुख मुनिलाल कुश्वाहाले बताउनुभयो । यस वर्ष माछाखोलामा ५०० क्विन्टल कोटा छ । डिपो सिर्दिबासमा शाखा गोरखाबाट २००० र विमलनगर बाट १५०० गरि ३५०० कोटा छुट्याईएकोमा विमलनगरबाट ६६० (छ सय साठी ) क्विन्टल खाद्यान्न ढुवानी भईसकेको छ ।
सिर्दिबास डिपोमा हाल ४५० क्विन्टल खाद्यान्न मौज्दात रहेको छ । सिर्दिबासमा हाल सोना मंसुली चामल प्रति किलो रु ५४ मा विक्रि भईरहेको छ । शाखामा प्राप्त स्टिम जिरा मसिनो चामल पनि तत्काल डिपोमा समेत चलान हुने र स्टिम चामलको डिपो सिर्दिबासमा प्रति क्विन्टल रु ७२ , डिपो माछाखोलामा प्रति क्विन्टल रु ७० पर्ने शाखा गोरखाका सुचना अधिकारी शिव सुनारले जानकारी दिनुभयो ।
