गोरखा, २४ पुष । जिल्ला सहकारी संघ लिमिटेड गोरखाको २९ औँ वार्षिक साधारण सभा सम्पन्न भएको छ । जिल्ला सहकारी संघका अध्यक्ष बाबुराम कोइरालको अध्यक्षता तथा गोरखा नगरपालिका मेयर रानामगरको प्रमुख आतिथ्यतामा हिजो शनिबार सहकारी संस्थाको वार्षिक साधारण सभा सम्पन्न भएको हो ।
कार्यक्रमका जिल्ला सहकारी संघका महासचिव सरोज देवकोटाले वार्षिक प्रगति प्रतिवेदन, कोषाध्यक्ष हरिराम अधिकारीले आर्थिक प्रतिवेदन र लेखा संयोजक सुजन कुँवरले लेखा समितिको प्रतिवेदन प्रस्तुत गर्नु भएका थिए । उक्त प्रतिवेदन सुझाव सहित साधारणसभाले अनुमोदन गरेको महासचिव देवकोटाले जानकारी दिनुभयो ।
कार्यक्रममा जिल्ला सहकारी संस्थाहरुका लागि तालिम संचालन गर्ने, सहकारी बहस पैरवी गर्ने, संघको पाँच वर्षे रणनीति अनुसार अगाडि बढाउने र जिल्लाभरी सहकारी संघ संस्थाहरुको प्रोफाइल तयार गर्ने नीति लिएको बताउनुभयो।उहाँका अनुसार संघले आगामी दिनहरुमा सहकारी सम्बन्धी विभिन्न कार्यक्रम संचालन गर्ने र जिल्ला सहकारी सघंलाई थप ब्यवस्थित रुपमा संचालन गर्ने योजना प्रस्तुत गरेको बताउनुभयो ।
कार्यक्रममा गोरखा नगरपालिकाका नगर प्रमुख कृष्ण रानामगरले सहकारी संघसंस्थाहरुले बचत तथा ऋण कारोबार मात्र नभई उत्पादन क्षेत्रमा पनि जोड दिनुपर्ने बताउनुभयो । त्यस्तै, बेरोजगार र साना ब्यवशायीलाई समेटेर आत्मानिर्भर बनाउनका लागि जिल्ला सहकारी संघले पहल गर्नुपर्ने उहाँको भनाई छ । जिल्ला सहकारी संघमा दुई सय चार वटा सहकारी आबद्ध रहेकोमा शनिबारको कार्यक्रममा एक सय २१ वटा सहकारी संघका प्रतिनिधिहरुको सहभागिता रहेको थियो ।
