गोरखा, १६ पुष । गोरखाका एक युवकको उपचारका लागि ३ लाख पचास हजार रुपैयाँ आर्थिक सहयोग प्रदान गरिएको छ । गएको पाँच महिनादेखि बोन म्यारो उपचारका लागी आर्थिक अभाव भोग्दै आएका पालुङटार नगरपालिका वडा नं २ खोप्लाङका १७ बर्षिय लक्ष्मण नेपालीको उपचारका लागि एकता स्वयम सेवक संस्थाको पहलमा संकलित रकम परिवारलाई हस्तान्तरण गरिएको हो ।
काठमाण्डौको सिभिल हस्पिटलमा उपचाररत नेपालीको बोन म्यारो ट्रान्सप्लान्टका लागि आर्थिक अभाव भएपछि परिवार समस्यामा परेका छन् । बिरामीको स्वास्थ्य अवस्था झनै गम्भीर हुँदै गएपछि संस्थाले दोस्रो पटक नेपालीको परिवारलाई आर्थिक सहयोग जुटाएर उपचारका लागि संकलित रकम बुझाएको समाजसेवी धिरज उपरकोटीले जानकारी दिनुभयो ।
संस्थाले यस अघि पनि नेपालीको परिवारलाई २ लाख पाँच हजार रुपैयाँ आर्थिक सहयोग गरेको थियो । अहिले संकलित गरेको रकम बोन म्यारो ट्रान्सप्लान्टको लागि न्युन भएकाले देश तथा बिदेशमा रहेका सवैसंग थप सहयोगका लागि अपिल गरिरहेको उहाँले बताउनुभयो । बोन म्यारो ट्रान्सप्लान्ट गर्न लगभग २० देखि २५ लाख रुपैयाँको आवश्यकता पर्ने परिवारको भनाई छ ।
