लमजुङ,१५ पुस । पिसाप फेर्न गाडीबाट ओर्लिएका सशस्त्र प्रहरीका जवान मर्स्याङदी नदीमा खसेर बेपत्ता भएका छन् । लमजुङको मर्स्याङ्दी गाउँपालिका ४, काप्रेभीरबाट मर्स्याङ्दीमा खसेर सशस्त्र प्रहरी जवान बेपत्ता भएका हुन् । लमजुङको बेंसीसहरदेखि मनाङतर्फ जाँदै गरेको ग१ज ७३३५ नम्बरको जिपमा सवार ३२ वर्षीय सशस्त्र प्रहरी जवान अनन्त महत पिसाब फेर्ने क्रममा लड्दा मर्स्याङ्दी नदीमा खसेको हो ।
सशस्त्र प्रहरी बल आश्रित गुल्म लमजुङका डीएसपी मानबहादुर शाहीका अनुसार शुक्रबार बिहान १० बजेतिर उक्त घटना भएको हो । उहाँका अनुसार खोजीकार्यका लागि बेंसीसहरबाट सशस्त्र प्रहरी र नेपाल प्रहरीको टोली पुगेर खोजतलास भइरहेको छ ।
रामेछापको लिखु तामाकोसी गाउँपालिका ४, विजुलीकोट (साविक विजुलीकोट गाविस ४) का महत सशस्त्र प्रहरीको २२ नं. गण महेश्वरी भक्तपुरबाट सरुवा भएर ३२ नं. गुल्म हेडक्वार्टर चामे मनाङ जाँदै थिए । बेंसीसहरबाट शुक्रबार बिहान मनाङतर्फ गएका उनी पिसाब फेर्न जाने क्रममा मर्स्याङ्दी नदीमा लडेको प्रहरीले जनाएको छ ।
