गोरखा, ७ पुस । गोरखा क्षेत्र नम्बर १ का प्रतिनिधिसभाका सांसद राजेन्द्र बजगाईंले सांसद भएबापत आफुले प्राप्त गर्ने सम्पूर्ण सेवासुबिधा सामाजिक कार्यमा खर्च गर्ने घोषणा गर्नुभएको छ । प्रतिनिधिसभा सदस्यको सपथ ग्रहणपछि उहाँले आज सामाजिक सञ्जाल मार्फतआफुले प्राप्त गर्ने तलब भत्ता बापतको सवै सुबिधाहरु बिपतमा परेका आफनो निर्वाचन क्षेत्रका नागरिकहरुका लागि खर्च गर्ने घोषणा गर्नुभएको हो ।
‘मैले सांसद भए बापत पाउने सम्पुर्ण तलब भत्ता गोरखा क्षेत्र नं १ मा बिपतमा परेकाहरुका लागि खर्चने घोषणा गर्दछु, उहाँले भन्नुभएको छ ‘ ‘गोरखाको बिकट भुगोल र भिरपखेरामा बिपतमा परेकाहरु नागरिकहरुको रेखदेख गर्न पुगोस् भन्ने अभिप्राय हो ।’ सांसद बजगाईंले सपथ ग्रहणका क्रममा समेत आफुले जनतासंग मत मागिरहेको बेला गरेको प्रतिबद्धता सम्झिएको उल्लेख गर्नुभएको छ ।
उहाँले आफू गोरखा क्षेत्र नम्बर १ को गरिब र भौगोलिक रुपमा विकट क्षेत्रका वासिन्दाको सहयोगमा सांसद बन्न सफल कुरा भएको नबिर्सिएको समेत उल्लेख गर्नुभएको छ । गत मङ्सिरमा सम्पन्न प्रतिनिधिसभाको निर्वाचनमा बजगाई बामलोकतान्त्रिक गठबन्धनबाट बिजयी हुनुभएको थियो ।
