विराटनगर, १४ कात्तिक। मोरङको उर्लाबारीमा छठ पूजा हेर्न गएका झापाका बालकको छुरा प्रहारबाट हत्या भएको छ ।
मोरङ र झापाको सीमाना भएर बग्ने मावा खोलामा आयोजित छठ मेलामा आएका १४ वर्षीय दियुस श्रेष्ठको छुरा प्रहारबाट हत्या भएको जिल्ला प्रहरी कार्यालय मोरङले जनाएको छ ।
एसपी कोइरालाका अनुसार उर्लाबारी नगरपालिका—७ मावा खोलाको किनारमा आयोजित छठ पूजाको मेला स्थलमा झापाको दमक नगरपालिका—१० का १४ वर्षीय श्रेष्ठमाथि छुरा प्रहार भएको थियो ।
छुरा प्रहारबाट गम्भीर घाइते उनलाई उपचारका लागि उर्लाबारीको गोदाबारी अस्पताल हुँदै विर्तामोडको बिएण्ड सी अस्पताल पुर्याइएको थियो । बीएण्डसीमा उपचारका क्रममा सोमबार विहान उनको मृत्यु भएको हो ।
घटनाको अनुसन्धानका लागि चार जनालाई नियन्त्रणमा लिइएको छ भने घटनामा संलग्न अन्यको खोजी भइरहेको जनाएको छ ।
मावा खोलामा किनारमा आइतबार राति १०ः२५ बजे उनीमाथि छुरा प्रहार भएको थियो । पुरानो रिसिईबीका कारण हत्या भएको प्रारम्भीक अनुसन्धानका क्रममा देखिएको मोरङका प्रहरी उपरीक्षक शान्तिराज कोइरालाले बताउनुभयो ।
प्रहरीका अनुसार छुरा प्रहारबाट बालकको बायाँ कोखामा गम्भीर चोट लागेको थियो ।
