काठमाडौं, ३० भदौ। पहिरोले पुरिएर काभ्रेपलाञ्चोक (काभ्रे)मा एकै परिवारका तीन जनाको मृत्यु भएको छ ।
बेथानचोक गाउँपालिका—४ चलालमा बुधबार राति साढे १ बजे तिर पहिरोले घर पुरिंदा एकै परिवारका तीन जनाको मृत्यु भएको हो ।
दुई जनाको घटनास्थलमै र एक जनाको उपचारका क्रममा मृत्यु भएको जिल्ला प्रहरी कार्यालय काभ्रेपलाञ्चोकका प्रमुख, प्रहरी उपरीक्षक (एसपी) चक्रराज जोशीले जानकारी दिनुभयो ।
एसपी जोशीका अनुसार ६५ वर्षीया ठूलीमाया तामाङको उपचारका क्रममा मृत्यु भएको हो भने उहाँका छोरा ४४ वर्षीय निरबहादुर तामाङ र छोरी ४० वर्षीया सावित्री तामाङको घटनास्थलमै मृत्यु भएको हो ।
ठूलीमायाको बनेपास्थित शिर मेमोरियल अस्पतालमा उपचारका क्रममा मृत्यु भएको हो ।
बेथानचोक गाउँपालिकाका उपाध्यक्ष ताराराना तिमल्सिनाका अनुसार केही दिनदेखि सञ्चालन हुँदै आएको ढुंगाखानी माथिबाट झरेको पहिरोले तामाङको घर पुरेको हो ।
