काठमाडौं, २३ साउन। ब्राजिलका मार्सल आर्टका वर्ल्ड च्याम्पियन एकजना खेलाडीलाई प्रहरीले गोली हानेको छ ।
ब्राजिलका मार्सल आर्ट खेलाडी लियन्द्रो लोमाथि साओपाउलोको एक नाइट क्लबमा प्रहरीले गोली हानेको बीबीसीले जनाएको छ ।
गोली लागेर घाइते भएका ३३ वर्षीय लियन्द्रोलाई अस्पताल भर्ना गरिएको छ । डाक्टरहरुले उहाँको ब्रेन डेथ भएको बताएको बीबीसीले जनाएको छ ।
ड्युटीमा नरहेका एक जना प्रहरी अधिकृतले उहाँमाथि गोली हानेर फरार भएको प्रत्यक्षदर्शीले जनाएका छन् ।
लो जियु—जित्सु एथलिट च्याम्पियनसिपको हालसम्मकै सफल खेलाडी मानिन्छ । यो विधामा उहाँ आठ पटक विश्व विजेता बनि सक्नु भएको छ ।
जियु—जित्सु ब्राजिलको एक मार्सल आर्ट र कोम्ब्याट स्पोर्ट हो । यो ग्राउण्ड फाइटिङ र सबमिशन होल्डमा आधारित छ ।
उहाँको हत्याको कोसिस गरिएको घटनामा प्रहरीले अनुसन्धान थालेको जनाएको छ ।
