गोरखा, २५ जेठ । जिल्ला समन्वय समिति गोरखाको प्रमुख सहित सबै सदस्य निर्विरोध निर्वाचित हुने भएका छन् । मुख्य निर्वाचन अधिकृतको कार्यालय गोरखाले प्रकाशन गरेको कार्यतालिका अनुसार ९ सदस्यीय समितिको जेठ ३० गते हुने निर्वाचनका लागि आज (बुधवार) दिउँसो १ वजेसम्म मनोनयनको समय तोकिएको थियो ।
सबै पदमा नेकपा माओवादी केन्द्रका उम्मेद्वारहरुले मात्रै मनोनयन दर्ता गराएका मुख्य निर्वाचन अधिकृत दिनबन्धु बराल जानकारी दिनुभयो । समन्वय समितिको प्रमुखमा गोरखा नगरपालिका ९ बाट वडासदस्य निर्वाचित मोहनबहादुर थापामगरको उम्मेद्वारी परेको छ ।
यस्तै उपप्रमुखमा शहिद लखन गाऊँपालिका ९ की लीला परियारले मनोनयन दर्ता गर्नु भएको छ । सदस्यहरुमा वारपाक सुलिकोट गाऊँपालिका ४ का मोहन ढकाल, भिमसेन थापा गाऊँपालिका ६ का मोहम्मद हकिम र गण्डकी गाऊँपालिका ७ का शिवप्रसाद रेग्मीले मनोनयन दर्ता गराएका निर्वाचन अधिकृत बरालले बताउनु भयो।
यस्तै ३ जना महिला सदस्यमा अजिरकोट गाऊँपालिका ५ बाट वडा सदस्य निर्वाचित इन्दिरा देवकोटा, धार्चे ३ की प्रमिना घले तथा सिरानचोक ८ की मिरा उपरकोटीको उम्मेद्वारी परेको छ ।
दलित वा अल्पसंख्यकतर्फको १ जना सदस्यमा पालुङटार नगरपालिका २ का गंगाबहादुर बयलकोटीको मात्रै मनोनयन दर्ता भएको निर्वाचन अधिकृतको कार्यालयले जनाएको छ। सबै पदमा एकरएक जनाको मात्रै उम्मेद्वारी परेकाले उनीहरु सबै स्वतः निर्वाचित हुने छन् ।
जिल्ला समन्वय समितिको कुल २२ जना मतदाता रहेकोमा माओबादीको स्पस्ट बहुमत रहेको छ । जिल्लाका ११ वटा स्थानीय तह मध्ये माओबादी केन्द्रले ९ पालिकामा प्रमुख र ६ पालिकामा उपप्रमुख जितेको छ । त्यस्तै नेपाली काग्रेसले २ पालिकामा प्रमुख र ५ पालिकामा उपप्रमुख जितेको छ ।
