गोरखा, २२ जेठ । जिल्ला समन्वय समिति गोरखाको निर्वाचन यहीँ जेठ ३० गते हुने भएको छ । मुख्य निर्वाचन अधिकृतको कार्यालय गोरखाले जिल्ला समन्वय समितिको निर्वाचनका लागि आज मतदाता नामावली सार्वजनिक तथा निर्वाचन कार्यतालिका समेत प्रकाशन गरेको हो ।
कार्यालय जारी गरेको सूचना अनुसार समन्वय समितिको निर्वाचनका लागि यहीँ जेठ २५ गते उमेद्वारको मनोनयन पत्र दर्ता र सूची प्रकाशन गर्ने कार्यतालिका रहेको छ । त्यस्तै जेठ २६ गते उमेद्वारका बिरुद्ध दावी बिरोध, जेठ २७ गते मनोनयन पत्रको जाँच र उजुरी गर्ने कार्यतालिका रहेको मुख्य निर्वाचन अधिकृत दिनबन्धु बराल जानकारी दिनुभयो ।
सोही दिन उम्मेद्वारको नामावली प्रकाशन गरिने र २७ गते बिहान १० बजे भित्रमा उमेद्वारले नाम फिर्ता लिनसक्ने कार्य तालिका रहेको छ । कार्यालयले जारी गरेको सूचनामा जेठ २९ गते उम्मेद्वारलाई निर्वाचन चिन्ह प्रदान गरिनेछ भने जेठ ३० गते बिहान ११ वजे मतदान कार्यक्रम शुरु हुने मुख्य निर्वाचन अधिकृतको कार्यालयले जनाएको छ ।
जिल्ला समन्वय समितिमा प्रमुख र उपप्रमुख सहित ९ सदस्य रहने निर्णय आज बसेको जिल्ला सभाले निणर्य समेत गरेको भीमसेन थापा गाउँपालिकाका अध्यक्ष लोकप्रसाद बन्जराले जानकारी दिनुभयो । स्थानीय तह निर्वाचन ऐन ०७३ अनुसार अब गाउँपालिका र नगरपालिकामा निर्वाचित प्रमुख, उपप्रमुख, वडा अध्यक्ष र सदस्यहरु समेत जिल्ला समन्वय समितिका प्रमुखमा उमेदवार हुन पाउनेछन् ।
जिल्ला समन्वय समितिको प्रमुख र उपप्रमुख चुनिनका लागि मतदान भने गाउँपालिका र नगरपालिकाका प्रमुख र उपप्रमुखले मात्रै गर्न पाउने व्यवस्था रहेको छ । कुल २२ जना मतदाता रहेको जिल्ला समन्वय समिति गोरखामा माओबादीको स्पस्ट बहुमत रहेको छ । जिल्लाका ११ वटा स्थानीय तह मध्ये माओबादी केन्द्रले ९ पालिकामा प्रमुख र ६ पालिकामा उपप्रमुख जितेको छ । त्यस्तै नेपाली काग्रेसले २ पालिकामा प्रमुख र ५ पालिकामा उपप्रमुख जितेको छ ।
