गोरखा, १२ जेठ । गोरखाको पालुङटार नगरपालिका वडा नं. ३ का नवनिर्वाचित वडाअध्यक्ष रविन्द्र अधिकारीले वडाको अतिविपन्न परिबारलाई वडा कार्यालयबाट निशुल्क स्वास्थ्य बिमा गराइदिने घोषणा गरेका छन् ।
नवनिर्वाचित वडाअध्यक्ष अधिकारीले पदभार ग्रहण गरेपछिको पहिलो बैठकले वडाभित्रका अति विपन्न समुदायलाई निशुल्क स्वास्थ्य बीमा गराउने निर्णय गरेको हो ।
उक्त वडाभित्र दलित र गरिब बिपन्न समुदायको बसोबास धेरै रहेको छ । यसअघि वडा सदस्य हुँदा पनि ज्येष्ठ नागरिक र रातोकार्डवाला अपांगहरुलाई घरघरमा पुगेर खोजीखोजी निशुल्क स्वास्थ्य वीमा गराउन मद्दत गरेको उहाँको भनाई छ ।
त्यसको महत्व र प्रभावकारिता धेरै रहेकाले आफू वडाअध्यक्ष भएपछि अतिविपन्न दलित तथा गैरदलित परिबारको निशुल्क स्वास्थ्य बीमा गराउने निर्णय गरेको वडाअध्यक्ष रविन्द्र अधिकारी जानकारी दिनु भयो ।
आँपपीपल अस्पताल नजिक भएकाले स्वास्थ्य बीमा भएपछि उनीहरुले प्रभावकारी स्वास्थ्य सेवा पाउनेमा आफु विश्वस्त रहेको उहाँले बताउनु भयो ।
