गोरखा, २३ वैशाख । नेपाली कांग्रेस गोरखाले सङ्कल्प पत्र सार्वजनिक गरेको छ । आज (शुक्रवार) पार्टी कार्यालयमा पत्रकार सम्मेलन गर्दै कांग्रेस जिल्ला सभापति नन्दप्रसाद न्यौपानेले ‘नेपाली कांग्रेसको उपहार, भ्रष्टाचारमुक्त स्थानीय सरकार’, नारालाई जोड दिँदै १ शय १५ बुँदे सङ्कल्प पत्र सार्वजनिक गरेका हुन् ।
सभापति न्यौपाने पार्टीले स्थानीय तहको निर्वाचनमा बिजयी गरेको खण्डमा सार्वजनिक गरेको सङ्कल्प पत्र अनुसार काम गर्ने बताउनु भएको छ । सङ्कल्प पत्रमा स्वास्थ्य, शिक्षा, कृषि, पूर्वाधारका विषयलाई विशेष जोड दिएको उहाँले बताउनु भयो । पाँच वर्षको अवधिमा गर्न सकिने खालका काम मात्रै संकल्प पत्रमा समेटेको बताउँनु हुदै उहाँले सोही अनुसार स्थानीय तहमा बिजयी जनप्रतिनिधिले काम गर्ने दावी गर्नु भएको छ ।
सङ्कल्प पत्रमा उल्लेख भएअनुसार जनप्रतिनिधिले काम गरे नगरेको समीक्षासमेत गरिने कांग्रेस जिल्ला सचिव किशोरजंग थापाले बताउनु भयो । पारदर्शिता र सुशासनलाई कांग्रेसले प्राथमिकतामा राखेकाले यो सबैले अनिवार्य गर्नुपर्ने उहाँको भनाई छ ।
सङ्कल्प पत्रमा निशुल्क उपचार, स्वास्थ्य बिमा प्रभावकारी बनाउने, अनिवार्य शिक्षा, प्रविधिमैत्री शिक्षा, विद्युत र इन्टरनेटको बिस्तार, छात्रामैत्री शौचालय निर्माण लगायतका विषय उल्लेख छन् । कृषि पशुपालन, ब्यवशायिक खेती, कृषि उपजको खरिद बिक्री केन्द्र, किसानलाई सहुलियतमा मल, उत्पादनका आधारमा पकेट क्षेत्र निर्धारण गर्ने विषयलाई कांग्रेसले सङ्कल्प पत्रमा उल्लेख गरेको छ ।
पर्यटन सूचना केन्द्र संचालन, बूढीगण्डकी आयोजना क्षेत्रलाई पर्यटन क्षेत्रको रुपमा विकास गर्ने, गोरखा, पालुङ्टार र मनकामनालाई पर्यटकीय नगरीको रुपमा विकास गर्ने, गोरखा सदरमुकामलाई ऐतिहासिक पर्यटकीय मूख्य गन्तब्य बनाउने योजना पनि पत्रमा रहेको जिल्ला सचिव थापाले जानकारी दिनुभयो ।
