गोरखा ६, पुस । नेपाली कांग्रेसको १४औं महाधिवेशनबाट केन्द्रीय सदस्यमा गोरखाका एक जना मात्र बिजयी भएका छन् । यस अघि पनि केन्द्रीय सदस्य रहनुभएका नेता सुरेन्द्रराज पाण्डे बिजयी हुनुभएको हो । पालुङटार नगरपालिका १ खोप्लाङ घर भएका पाण्डे खुल्ला ३५ केन्द्रीय सदस्यभित्र २२ औँ स्थानमा पर्न सफल हुनुभएको हो ।
पाण्डेले २ हजार २०१ मत पाएर विजयी भएको हो। नेता पाण्डे शेरबहादुर देउवा निकट हुनुहुन्छ ।केन्द्रीय समितिमा निर्वाचित गोरखाबाट उहाँ पहिलो हुनुहुन्छ । खुल्लातर्फ उम्मेद्वारी दिएका महासमिति सदस्य राजेन्द्र बजगाई र दीपकबाबु कँडेल भने पराजित भएका छन् ।
जनजातितर्फ चिनकाजी श्रेष्ठ, जनजाति महिलातर्फ मनकुमारी गुरुङ, अल्पसंख्यकबाट हरिबहादुर घले, खस आर्यतर्फ मोहनप्रकाश पोखरेल, मुस्लिम आरक्षण तर्फबाट अब्दुल सतारले पनि केन्द्रीय सदस्यमा उम्मेदवारी दिएका छन् । उहाँहरुको मत गणना हुन बाँकी छ ।
