गोरखा १९, असोज । नेपाल काग्रेसको १४ औं महाधिबेशन अन्तरगत जिल्ला कार्यसमितिको सचिव, सहसचिव र सदस्य पदका मतदान सुरु भएको छ । सदरमुकामको कर्भड हलममा मतदान सुरु भएको हो । बिहान ८ बजेदेखि नै मतदान सुरु हुने भनिएपनि करिब दिउँसो १२ : ४५ बजेदेखि मतदान सुरु भएको जिल्ला निर्वाचन समितिले जनाएको छ ।
निर्वाचनमा ढिलो गरी सुरु भएपछि बिहानदेखि लाईनमा बसेका मतदाताहरु घामले अत्तालिएपछि केही बेर होहल्ला समेत भएको थियो । खेलकुद मैदानमा भोट हाल्न लाइनमा बसेका मतदाताहरु लामो समयसम्म पनि पालो नआएपछि प्रहरी समेतलाई धकेलेर मतदान गर्न कर्भड हल भित्र प्रवेश गरेका थिए । जिल्ला निर्वाचन समितिका अनुसार उपसभापतिमा पाँच जना, सचिवमा पाँच जना, सहसचिवमा आठ बिच प्रतिस्पर्धा हुनेछ ।
उप सभापतिमा इमानसिंह बस्नेत, धिरन थापा, रविकला खनाल, सिपी पोखरेल र हरीबहादुर गान्धरीले उम्मेदवारी दिएका छन् भने सचिव पदमा किशोरजंग थापा, ओम गुरुङ, कृष्णबहादुर आले, रामप्रसाद भण्डारी, तारानाथ पुडासैनीले उमेद्वारी दिएका छन् । सचिव र सहसचिव पदमा दुई दुई जना मात्र निर्वाचित हुनेछन् ।
यसअघि काग्रेस जिल्ला सभापतिमा भने नन्दप्रसाद न्यौपाने सर्वसम्मत भइसक्नु भएको छ । कोषाध्यक्ष पद भने मनोनयनबाट ल्याउने व्यवस्था रहेको छ । पदाधिकारी बाहेक सदस्य पदमा समेत मतदान भइरहेको निर्वाचन समितिले जनाएको छ ।
