नागरिक सवाल
काठमाण्डौं १३, साउन । नेपाली काँग्रेसले क्रियाशील सदस्यताका बाँकी विवाद टुंगो लगाउने जिम्मा क्रियाशील सदस्यता छानविन समितिलाई नै दिएको छ । प्रधानमन्त्री समेत रहनुभएका पार्टी सभापति शेरबहादुर देउवाको निवास बुढानीलकण्ठमा आज बसेको काँग्रेस पदाधिकारी तथा पूर्व पदाधिकारीहरुको बैठकले छानविन समितिलाई २४ घण्टा समय दिएको प्रवक्ता विश्वप्रकाश शर्माले जानकारी दिनुभयो ।
रमेश लेखक नेतृत्वको छानविन समितिले हिजो पार्टी सभापति देउवालाई बुझाएको प्रतिवेदनमा १५ /१६ वटा निर्वाचन क्षेत्र नटुंगिएको उहाँले बताउनुभयो । समितिले २४ घण्टा गृहकार्य गरेपछि भोलि फेरि पार्टीको बैठकमा छलफल हुने छ ।
क्रियाशील सदस्यता छानबिन नटुगिएका कारण काँग्रेसको महाधिवेशन कार्यतालिका प्रभावित भइसकेको छ । साउन १२ गतेका लागि तय भएको वडा तहको अधिवेशन स्थगित भइसकेको छ ।
