कास्की ११, साउन । देशकै पर्यटकीय नगरी पोखरामा पहिलो पटक आकाशे पुल सञ्चालनमा आएको छ । बढ्दो सवारी चापलाई ध्यान दिदै पोखरा महानगरपालिकाले यात्रुलाई बाटो काट्न सहज होस् भन्ने उद्देश्यका साथ आकाशे पुल निर्माण गरेको हो । पोखराको सिर्जनाचोकमा निमाण भएको आकाशे पुललाई महानगरपालिकाको २ दुई करोड १५ लाखको लागतमा स्टिल ट्रस पेडेस्ट्रेन ओभरहेड ब्रिज निर्माण गर्न खर्च भएको महानगरका इञ्जिनीयर राजु रेग्मीले जानकारी दिनुभयो ।
पोखरामा निर्माण गरी सञ्चालनमा आएको यो आकाशे पुल गण्डकी प्रदेशकै पहिलो हो । पुलमा रङरोगन र सिसाको छानो राख्नेबाहेक सम्पूर्ण निर्माण कार्य सम्पन्न भई सञ्चालनमा आएको छ । यो पुल चारै दिशाबाट उक्लन र ओर्लन सकिने खालको हो ।महानगरसँग २०७६ जेठ ५ गते आकाशे पुल निर्माणको लागि केएम जेबिएनएस पोखरा जेबीसँग सम्झौता भएको उक्त पुलको निर्माणकार्य २०७७ साउनसम्म सम्पन्न गर्ने लक्ष्य रहेको थियो ।
कोरोना महामारीका कारण निर्माणकार्य ढिला भई १ वर्षपछि सम्पन्न भएको हो । आकाशे पुलमा केही दिन देखी साँझपख सर्वसाधारणको घुइँचो नै लाग्ने गरेको छ । जिल्ला ट्राफिक प्रहरी कार्यालय कास्कीले आकाशे पुल निर्माण संगै सवारी दुर्घटनामा केही कमी आउने बताएको छ ।
