काठमाण्डौं ३, साउन । विश्वभर कोरोना सङ्क्रमणका कारण मृत्यु हुनेको संख्या ४१ लाख नजिक पुगेको छ । पछिल्लो समय अमेरिका, ब्राजिल, रुस, बेलायत लगायतका मुलुकमा कोरोना सङ्क्रमणको दरमा वृद्धि आउनुका साथै मृत्युदर पनि बढ्न थालेको देखिन्छ । विश्व स्वास्थ्य संगठनका अनुसार विश्वका विभिन्न मुलुकमा कोरोना महामारीको तेस्रो चरणको लहर सुरु भएको छ । जसका कारण जनजीवन फेरि असामान्य बन्दै गएको छ ।
विगत झन्डै ३/४ महिनादेखि नियन्त्रणमा रहेको कोरोना सङ्क्रमणको दर बढेको भन्दै संगठनले सबैलाई जनस्वास्थ्यका मापदण्ड लागू गर्न आग्रह गरेको छ । पछिल्लो अद्यावधिक तथ्याङ्क अनुसार गत २४ घन्टामा विश्वभर थप ८ हजार ६ सय ५३ जनाको कोरोनाका कारण मृत्यु भएको र योसँगै विश्वभर कोरोनाका कारण मृत्यु हुनेको संख्या ४० लाख ९३ हजार ५० पुगेको छ ।
सङ्क्रमित हुनेको संख्या १९ करोड नाघेको छ । गत २४ हालसम्म विश्वभर कोरोनाका ५ लाख ६२ हजार ८ सय नयाँ सङ्क्रमित थपिएका छन् । योसँगै विश्वभर कोरोनाका कारण सङ्क्रमित हुनेको संख्या १९ करोड ४ लाख ३ हजार ५ सय ६६ पुगेको छ । यस्तै विश्वभर कोरोना सङ्क्रमणपछि निको हुनेको संख्या १७ करोड ३५ लाख ७३ हजार ४ सय १६ पुगेको छ ।
