काठमाण्डौं १५, असार । १६ औं संस्करणको युरोकप फुटबल प्रतियोगिता अन्तर्गत आज नकआउट चरणका अन्तिम दुई खेलहरु हुँदैछन् । आज राति हुने पहिलो खेलमा इंग्ल्यान्ड र जर्मनीबीच प्रतिस्पर्धा हुनेछ । भने दोस्रो खेलमा स्विडेन र युक्रेनबीच प्रतिस्पर्धा हुनेछ । लण्डनस्थित वेम्बली स्टेडियममा हुने इंग्ल्यान्ड र जर्मनीबीचको खेल राति ९ : ४५ बजे सुरु हुनेछ ।
दुबै टिम जित निकाल्दै क्वाटरफाइनलमा पुग्ने योजनामा मैदान उत्रने छ । स्विडेन र युक्रेनबीचको खेल राती १२ : ४५ मा सुरु हुनेछ । यसअघि, गयराति भएको खेलबाट स्विटजरल्याण्ड र स्पेन युरोकप फुटबलको क्वाटरफाइनलमा प्रवेश गरेको छ । हिजो भएको खेलमा साविक उपविजेता फ्रान्सलाई पेनाल्टी सुटआउटमा ५–४ गोल अन्तरले पराजित गर्दै स्विट्जरल्यान्ड अन्तिम आठमा पुगेको हो ।
रोमान्चक खेलको निर्धारित ९० मिनेट र अतिरिक्त समय ३–३ गोलको बराबरीमा सकिएपछि खेल पेनाल्टी सुटआउटमा गएको थियो । पेनाल्टीमा स्विट्जरल्यान्डले फ्रान्सलाई पराजित गर्यो । हिजै भएको अर्को खेलमा स्पेनले क्रोएसियालाई अतिरिक्त समयमा ५–३ गोल अन्तरले पराजित गर्दै क्वाटरफाइनलमा स्थान सुरक्षित गरेको छ ।
