काठमाण्डौ १२, असार : नेकपा एमाले कर्णाली प्रदेश सभाका तीन जना सांसद फेरि निलम्बित भएका छन् । प्रदेशसभा सचिवालयले हिजो एक सूचना जारी गरी एमाले संसदीय दलको निर्णयअनुसार सांसद अम्मरबहादुर थापा, कुर्मराज शाही र नन्दसिंह बुढालाई एक महिनाका लागि निलम्बन गरेको जनाएको छ ।
सूचनामा एमाले संसदीय दलको हिजो बसेको बैठकको निर्णयअनुसार तीन जना सांसदहरुलाई निलम्बन गरिएको उल्लेख छ । गत वैशाख ३ गते फ्लोरक्रस गरेर मुख्यमन्त्री महेन्द्रबहादुर शाहीलाई विश्वासको मत दिएका सांसद प्रकाश ज्वालासहित उनीहरु निलम्बनमा परे पनि जेठ २७ गते सर्वोच्च अदालतले पुनर्बहालीको निर्णय सुनाएको थियो ।
