काठमाडौं १४ फागुन । महिला लघुवित्तको धितोपत्रको प्रारम्भिक सार्वजनिक निष्कासन (आईपीओ) बाँडफाँड भएको छ । बिक्री प्रबन्धक नेपाल एसबीआई मर्चेन्ट बैंकिङले शुक्रबार बिहान आईपीओ बाँडफाँड गरेको हो ।
कम्पनीको आईपीओका लागि आवेदन दिएका १५ लाख ३६ हजार ६८२ आवेदकमध्ये ३७ हजार ५०० आवेदकलाई गोलाप्रथाबाट १० कित्ताको दरले बाँडफाँड गरिएको बिक्री भएको जनाएको छ । सेयरका लागि आवेदन दिएको योग्य आवेदक मध्येपनि १४ लाख ९९ हजार १८२ आवेदकको भने रित्तो हात भएको छ ।
लघुवित्तको आईपीओमा १५ लाख ४० हजार ३५ जना आवेदकबाट दुई करोड ३७ लाख ४७ हजार ५९० कित्ता सेयर खरिदको लागि आवेदन परेको थियो । जसमध्ये तीन हजार ३५३ जनाको आवेदन रद्द भएको जनाइएको छ ।
आईपीओ निष्कासनपछि कम्पनीको चुक्ता पुँजी १० करोड रुपैयाँ पुग्नेछ ।
कम्पनीको आईपीओ नतिजा सीडीएसीको मेरो सेयर वेबसाइट, बिक्री प्रबन्धक नेपाल एसबीआई मर्चेन्ट बैंकिङको वेबसाइट र महिला लघुवित्तको वेबसाइटमा आज केही समयपछि हेर्न सकिनेछ ।
