काठमाण्डौ ९, फागुन । सरकारले भारतको सेरम इन्ष्टिच्युटबाट किनेको कोभिड १९ विरुद्धको १० लाख डोज खोप नेपाल आइपुगेको छ । आज दिउँसो एयर इन्डियाको विमानबाट कोभिशिल्ड खोप त्रिभुवन विमानस्थल आइपुगेको हो ।
सरकारले सेरमसँग २० लाख डोज खोप किन्ने निर्णय गरेको थियो र त्यसका लागि अग्रिम भुक्तानी पनि दिइसकेको छ । यसैबीच, गत २४ घण्टाभित्र नेपालमा ८० जना कोरोना सङ्क्रमित थपिएका छन् । यो अवधिमा तीन हजार तीन सय २५ जनाको पीसीआर परीक्षण गर्दा ८० जनामा सङ्क्रमण पुष्टि भएको स्वास्थ्य तथा जनसंख्या मन्त्रालयले जानकारी दिएको छ ।
यससँगै नेपालमा कूल सङ्क्रमितको संख्या दुई लाख ७३ हजार चार सय ३१ पुगेको छ । कोरोना सङ्क्रमणका कारण नेपालमा हालसम्म दुई हजार ६१ जनाको मृत्यु भइसकेको छ ।
