गोरखा ११, माघ । नेपाली काँग्रेसका केन्द्रिय सदस्य सुरेन्द्रराज पाण्डेले गोरखा क्षेत्र नम्बर २ कार्यकर्ताले अब रुख बाहेक अरु चुनाव चिन्हमा भोट हाल्नु नपर्ने समेत बताउनु भएको छ । गोरखा सदरमुकाममा प्रेस यूनियन गोरखाको आयोजनामा भएको पत्रकार सम्मेलनमा बोल्दै उहाँले यस्तो बताउनु भएको हो ।
‘अब हुने जुनसुकै निर्वाचनमा गोरखा क्षेत्र नम्बर २ मा कांग्रेसका कार्यकर्ताले रुख बाहेक अन्य चिन्हमा भोट हाल्नु पर्दैन, उहाँले भन्नुभयो, ‘कांग्रेसका कार्यकर्ताले अन्यत्र भोट हाल्नुपर्दा मन दुखेको छ मैले बुझेको छु ।’ नेता पाण्डले संसद बिघटनको मुद्दालाई लिएर सर्वोच्च अदालतलाई सबै क्षेत्रले प्रभावमा पार्न खोजेको आरोप लगाउनु भएको छ ।
नेता पाण्डेले सर्वोच्चबाट संसद पुनस्थापना भएपनि र पुनस्थापना नभएपनि काग्रेसलाई त्यो मान्य हुने बताउनुभयो । उहाँले अदालतमा बिचाराधिन मुद्धामा कसैले पनि प्रभाव पार्न नहुने भन्दै स्वतन्त्र न्यायलयलाई दवाव दिन नहुनेमा जोड दिनुभयो । गोरखा क्षेत्र नम्बर १ संगठन सुदृढिकरणका लागिगृह जिल्ला आउनु भएका नेता पाण्डेले प्रधानमन्त्री स्वयंले र प्रधानमन्त्रीको कदम असंवैधानिक भन्नेमा भने काग्रेस स्पस्ट रहेको बताउनुभयोे ।
फरक प्रसंगमा एउटै पार्टी भित्रका पुष्पकमल दाहाल (प्रचण्ड) र माधवकुमार नेपालमाथी प्रधानमन्त्री केपी शर्मा ओली प्रहार गरेपछी मात्र दाहाल–नेपालले ओली सर्वसत्ताबादी र तानाशाह भएको थाहा पाएको उल्लेख गर्नुभयो । नेकपाको दुबै गुट कांग्रेसलाई साथ लिन तछाड मछाड गरिरहेको बताउँदै उहाँले तत्काल कुनै पनि पक्षसँग सहकार्य गर्नु कांग्रेसलाई आवश्यक नरहेको बताउनुभयो ।
