नुवाकोट ६, मङ्सिर ।त्रिशूली नदीले बगाएर नुवाकोटको ढुंगेबजारका एक युवक तीन दिनदेखि वेपत्ता भएका छन् । कवाडी सामान संकलन गर्ने क्रममा चिप्लियर नदीमा खसेका युवकको खोजी कार्य जारी रहेको प्रहरीले जनाएको छ ।
नदी किनारमा बुधबार बिहान कवाडी सामान संकलन गर्ने क्रममा विदुर नगरपालिका वडा नं. १ ढुंगेवजारका ५२ वर्षिय सोमबहादुर नगरकोटीलाई नदीले बगाएर वेपत्ता बनाएको जिल्ला प्रहरी कार्यालय नुवाकोटले जनाएको छ ।
उनको खोजीमा सुरक्षाकर्मी परिचालन भएको प्रहरी नायव उपरिक्षक हरिबहादुर वलीले जानकारी दिनुभयो । वेपत्ता सोमवहादुरको खोजीमा आफन्तजन, नेपाल प्रहरी, शसस्त्र प्रहरी तथा सेना परिचालित भएपनि शुक्रवार बेलुकीसम्म पनि फेला पार्न नसकिएको उहाँले बताउनुभयो ।
