काठमाण्डौ ३, मङ्सिर । सत्तारूढ नेपाल कम्युनिष्ट पार्टी नेकपाले स्थायी र केन्द्रीय कमिटी बैठक बोलाउने निर्णय गरेको छ । आज बालुवाटारमा बसेको सचिवालय बैठकपछि प्रवक्ता नारायणकाजी श्रेष्ठले मंसिर १८ मा स्थायी कमिटी बैठक बस्ने जानकारी दिनुभयो । यस्तै मंसिर १५ गते बस्ने तय भएको केन्द्रीय कमिटी बैठकलाई मंसिर २५ गतेसम्मका लागि सार्ने निर्णय पनि भएको छ ।
यस्तै अर्को सचिवालय बैठक मंसिर १३ गते बस्ने छ । १३ गते बस्ने सचिवालय बैठकमा अध्यक्ष ओलीले पेश गर्ने प्रस्तावबारे पनि छलफल हुनेछ । आजको सचिवालय बैठकमा प्रधानमन्त्री समेत रहनुभएका अध्यक्ष केपी शर्मा ओलीले आफ्नो तर्फबाट पनि प्रस्ताव पेश गर्ने बताउनुभएको थियो ।
गत शुक्रबार कार्यकारी अध्यक्ष पुष्पकमल दाहाल प्रचण्डले अर्का अध्यक्ष ओलीको आलोचना गर्दै प्रस्ताव सचिवालयमा पेश गर्नुभएको हो । यसैबीच, नेकपाका महासचिव विष्णु पौडेलले सचिवालयका सदस्यहरुको सामूहिक राजीनामाको प्रस्ताव गर्नुभएको छ । आज बसेको सचिवालय बैठकमा उहाँले सो प्रस्ताव राख्नुभएको हो ।
सचिवालयका सबै सदस्य असफल भएको भन्दै उहाँले सबैले सामूहिक राजीनामा दिन प्रस्ताब गर्नुभएको थियो । उहाँले पार्टीको जिम्मेवारी नयाँ पुस्तालाई दिन र सचिवालयमा पनि नयाँ पुस्ता ल्याउन प्रस्ताव गर्नुभएको छ ।
