काठमाण्डौ ६, कात्तिक । भारतीय गुप्तचर संस्था रिसर्च एण्ड एनालाइसिस विङ ‘रअ’ का प्रमुख सामन्तकुमार गोयल नेपालमा राजनीतिक हलचल मच्चाएर दिल्ली फर्किनु भएको छ । बुधबार बिमान नै चार्टर गरेर नेपाल आउनुभएका गोयलले करिब २२ घण्टा भित्रमा नेपालमा उच्च राजनीतिक भेटघाट गर्नुभएको जनाइएको छ ।
‘रअ’ प्रमुख योगल नेपाल आएको बारेमा सत्तारुढ नेकपाका जिम्मेवार नेताहरुलाई समेत जानकारी नभएको बताइएको छ । उहाँ नेपाल आएको भन्ने कुरा पत्रपत्रिकामा समाचार आएपछि मात्र सार्वजनिक भएको थियो । ‘योगल नेपाल किन आउनुभयो, कसको निमन्त्रणमा आउनुभयो, कसकसलाई भेट गर्नुभयो त्यसको कुनै जानकारी छैन, एकउच्च स्रोतले भन्यो, ‘यसरी सूचना लुकाएर गरिएको भेटघाट शंकास्पद छ कि भनेर लाग्नु स्वभाविक नै हो ।’
नेपालमा र भारत बिचको सिमाबिबाद, नेकपा भित्रको बिबाद लगायत समग्र राजनीतिक घटनाक्रमको जानकारी लिएर गोयल दिल्ली फर्किएको हुनसकने अनुमान उच्चस्रोतको छ । बिहिबार दिल्ली फर्किनु भएका गोयल फर्किएको जानकारी समेत उहाँ बिमानस्थलमा पुगेको एउटा फोटो सार्वजनिक भएपछि मात्र थाहा भएको थियो । सरकारी पक्षले ‘रअ’का प्रमुख गोयलको भ्रणम र भेटघाटलाई गोप्य राखेको छ ।
तर, केही महीना अघिदेखि सत्तारुढ नेपाल कम्युनिष्ट पार्टी (नेकपा) मा शक्ति संघर्ष शुरु भएको र वर्तमान सरकारको भविष्य अनिश्चित बनेपछि भने भारतीय गुप्तचरहरु काठमाडौंमा सक्रिय हुन थालेको चर्चा शुरु भएको थियो। त्यही सेरोफेरोमा ‘रअ’ प्रमुख आउनु भएको हो ।
कतिपयले भने चीन भारत सम्बन्धमा बढेको तनावका कारण पनि नेपालसँग सम्बन्ध सुधार गर्नुपर्ने दबाबमा रहेकाले भारतले गुप्तचर प्रमुखलाई काठमाडौं पठाएको हुनसक्ने बताएका छन् ।
त्रिभुवन अन्तर्राष्ट्रिय विमानस्थल सुरक्षा स्रोतका अनुसार योगल सहितको टोली ‘रअ’ को टोली आईएफबी ६०४५ कल साइनको चार्टर्ड उडानबाट दिल्ली फर्किएका हुन् । उक्त जहाज बुधबार दिउँसो पौने १ बजे त्रिभुवन विमानस्थलमा अवतरण भएको थियो। जहाजमा आएकाहरूलाई लिन काठमाडौंस्थित भारतीय दूतावासका उच्च अधिकारीहरू विमानस्थल पुगेका थिए।
