गोरखा ५, कात्तिक ।कोरोना भाइरस संक्रमण परीक्षणका लागि गोरखाबाट काठमाडौं पठाइएको स्वाब फिर्ता भएको छ ।काठमाडौंको राष्ट्रिय जनस्वास्थ्य प्रयोगशाला टेकुले स्वाव परीक्षण नगरी मंगलबार फिर्ता पठाएको स्वास्थ्य कार्यालय गोरखाले जनाएको छ ।
जिल्लाका विभिन्न स्थानीय तहका २ सय ३४ जनाको स्वाबको नमुना संकलन गरेर परीक्षणका लागि मंगलबार काठमाडौ पठाइएको थियो । प्रयोगशालाले परीक्षण गर्न नमानेपछि फिर्ता ल्याइएको स्वास्थ्य कार्यालय गोरखाका कोरोना फोकल पर्सन नारायण अर्यालले जानकारी दिनुभयो । अहिले ती स्वाब परीक्षणका लागि पोखरा पठाइएको अर्यालले जानकारी दिनुभयो ।
