गोरखा २८, भदौ । गोरखाको आरुघाट गाउँपालिका–९ स्थित आरुघाट बजार नजिकै कुकुरले टोकेर मारेको अबस्थामा चितुवा फेला परेको छ । गोरखा तर्फको आरुघाट बजारबाट धादिङ तर्फको आरुघाट बजार जाने कच्ची सडक खण्डमा मृताबस्थामा चितुवा फेला परेको डिभिजन बन कार्यालय गोरखाका प्रमुख असोककुमार श्रेष्ठले जानकारी दिनुभयो ।
कुकुरको आक्रमणबाट मारिएको चितुवाको सव डिभिजन कार्यालयमा हाता भित्र व्यवस्थापन गरिदै
अन्दाजी ६ महिनाको जस्तो देखिने चितुवालाई कुकुरहरुले टोकेर मारेको पाईएको अनुसन्धानका लागि घटनास्थल पुग्नु भएका डिभिजन बन कार्यालय गोरखाका साहायक बन अधिकृत बालकुमार नेपालीले जानकारी दिनुभयो । ‘घटनास्थलमा भेटिएको मृत चितुवाको आन्द्राभुडी समेत निस्किएको अबस्थामा फेला परेको छ, उहाँले भन्नुभयो, चितुवालाई आक्रमण गर्ने २ वटा कुकुर गम्भिर समेत घाइते भएका रहेछन् ।’
जंगल नजिकै रहेकाले आहाराको खोजीमा निस्किएको सानो चितवाले कुकुरलाई आक्रमण गरेपछि कुकुरहरु मिलेर चितुवालाई चिथोरेर मारेको हुनसक्ने साहायक बन अघिकृत नेपालीले बताउनुभयो । चारवटा बयस्क कुकुरहरुले मिलेर आक्रमण गरेका कारण सानो उमेरको चितुवा मारिएको उहाँले जानकारी दिनुभयो ।
चितुवालाई आक्रमण गर्दा घाइते भएको कुकुर
स्थानीयले राती नै थाहा पाएपछि घटनास्थलमा पुग्दा चितवा मरेको देखेर बन कार्यालयमा जानकारी गराएका थिए ।
बन कार्यालयको टोली सहित प्रहरी, जनप्रतिनिधी र स्थानीयको रहोबरमा मृताबस्थामा भेटिएको चितुवाको मुचुल्का तयार गरि सवडिभिजन बन कार्यालय ध्याम्पेसालमा परिष्रमा व्यवस्थापन गरिएको साहायक बनअधिकृत नेपालीले जानकारी दिनुभयो ।
