गोरखा ५, भदौं -गोरखामा आज थप एकजना कोरोना संक्रमितलाई उपचारपछि निको भएर आइसोलेसनबाट डिस्चार्ज गरिएको छ । गोरखा क्याम्पसको आइसोलेसनमा उपचाररत गोरखा नगरपालिका–६ हरमटारीकी ४७ बर्षिय कोरोना संक्रमित महिला उपचारपछि निको भएर घर पठाइएको गोरखा अस्पतालका निमित्त मेडिकल सुपरीटेण्डेन्ट डाक्टर नविन थापाले जानकारी दिनुभयो ।
गण्डकी प्रदेश जनस्वास्थ्य प्रयोगशाला पोखरामा गरिएको पछिल्लो पिसिआर परीक्षणका क्रममा उनिमा कोरोना नदेखिएपछि आइसोलेसनबाट डिस्चार्ज गरिएको गोरखा अस्पतालले जनाएको छ । यो संगै गोरखा जिल्लामा कोरोना भाइरस (कोभिड १९ ) निको हुनेको सख्या १ सय १८ पुगेको छ । जिल्ला अब एक जना मात्र कोरोना संक्रमित बिरामी उपचाररत रहेको अस्पतालका सूचना अधिकारी कृष्ण ढकालले जानकारी दिनुभयो ।
संक्रमित पालुङटार नगरपालिका–४ का ५० बर्षिय पुरुषको अहिले गोरखा क्याम्पसको आइसोलेसनमा उपचार भइरहेको उहाँले जानकारी दिनुभयो । गोरखा जिल्लामा अहिलेसम्म कोरोना संक्रमितको संख्या १२० पुगिसकेको छ । जसमध्ये ११८ जना उपचारपछि निको भएर घर फर्किएका छन् भने, १ जनाले उपचारका क्रममा ज्यान गुमाउनु परेको छ ।
