दीपक श्रेष्ठ
गोरखा १५, साउन
गोरखाको सिरानचोक गाउँपालिकाले भोलि पालिका भित्र सार्वजनिक बिदा दिने निर्णय गरेको छ । राष्ट्रिय बिभूति अमरसिंह थापाको २०४ औं स्मृति दिवसको अबसरमा सिरानचोक गाउँपालिकाले साउन १६ गते शुक्रबार पालिका भित्र सार्वजनिक बिदा दिने निर्णय गरेको प्रमुख प्रशासकिय अधिकृत भेषबहादुर कुँवरले जानकारी दिनुभयो ।
तत्कालिन गोरखा राज्यको रक्षा किल्ला गोरखाको सिरानचोककोटमा बिक्रम सम्बत १८३८ मा चौविसे राज्यहरुसंग लडाइमा शौर्य र रणकौशलको प्रर्दशन गर्न सफल तथा नेपाल एकिकरणमा महान भूमिका खेल्नु भएका थापाको सम्मानमा स्मृति दिवसको अबसर पारेर सार्वजनिक बिदा दिने निर्णय भएको गाउँपालिका अध्यक्ष राजु गुरुङले जानकारी दिनुभयो । बि.स १८७३ साउन १६ गते राष्ट्रिय बिभूति थापाको गोसाईकुण्डमा मृत्यु भएको दिनको अबसरमा बिदा दिने निर्णय गरिएको उहाँले बताउनुभयो ।
गाउँसभाको गएको असार ३१ गतेको बैठकले थापाको स्मृति दिवसको अबसरमा बिदा दिने निर्णय गरेको थियो । सार्वजनिक बिदामा गाउँपालिका भित्रका पालिका अन्र्तगतका सवै सरकारी कार्यालयहरु बन्द रहने उहाँले जानकारी दिनुभयो । स्मृति दिवसको अबसरमा शुक्रबार नै गाउँपालिका स्थित गाँखुको डाँडेमा अमरसिंह पार्क निर्माणका थालनी गर्न झण्डोत्तोलन कार्यक्रम रहेको गाउँपालिका अध्यक्ष गुरुङले जानकारी दिनुभयो ।
