गोरखा ४,चैत । गोरखाको बाह्रकिलो छेवेटारदेखि मसानेठाँटीसम्मको सडक कालोपत्रे गर्न ठेकेदारले ढिलाई गरेको बिरोधमा स्थानीयबासीहरुले आज यातायात अबरुद्ध गरेका छन् । सडकमा ढुङगा मुडा तेस्र्याएर उनिहरुले तत्काल सडक मर्मतको कामसक्न माग गर्दै बिरोध गरेका हुन् ।
समयमा सडक मर्मत नहुदा हिउँदका बेला वरपरका बासिन्दा धुलाम्मे हुनुपर्ने बाध्यता रहेको छ भने बर्खाका बेला बाटो हिलो हुदा हिडडुल गर्न नै समस्या हुने गरेको भन्दै स्थानीयबासी बिरोधमा उत्रिएका हुन् । उनिहरुले सडक मर्मतका लागि तत्काल गति नदिए थप ससक्त आन्दोलन गर्ने चेतावनी समेत दिएका छन् ।
सडक अबरुद्ध हुदा सो सडक भएर चल्ने सवारी साधनहरु चल्न सकेका छैनन् । उक्त सडक हुदै बारपाक, पालुङटार लगायतका स्थानमा सवारी साधन चल्ने गर्दछ । ११ किलो बारपाक सडक आयोजनाले उक्त सडक खण्ड मर्मतका लागि यहि जेठ ४ गते ठेक्का सम्झौता गरेको थियो । आयोजनामा गएको कात्तिक महिना भित्रमा काम सम्पन्न गर्ने गरि सम्झौता गरेको भएपनि अहिलेसम्म काम सम्पन्न हुन सकेको छैन ।
१२ किलो बजारदेखि मसाने ठाँटीसम्म ४ किलोमिटर सडक मर्मतका लागि गोरखा स्प्रोपेड रिकन्स्ट्रकसनसंग रु १ करोड ७७ लाख रुपैयामा ठेक्का सम्झौता गरेको थियो । उक्त खण्ड २०६६ सालमै कालोपत्रे भएको भएपनि सडक भत्किएकाले पुनः मर्मतका लागि आयोजनाले ठेक्का सम्झौता गरेको हो । तस्विर : पत्रकार किशोरजंग थापाको फेसबुकबाट साभार
