संखुवासभाको चैनपुरबाट नेत्रविक्रम चन्द विप्लब नेतृत्वको नेकपाका कार्यकर्ता पक्राउ गर्न प्रहरीले हवाई फायर गरेको छ । गस्तीमा रहेका प्रहरी टोलीलाई देख्नसाथ शंकास्पद गतिविधि गर्दै प्रहरीमाथि आक्रमण गरेपछि हवाईफायर गरी विप्लवका ५ जना कार्यकर्तालाई नियन्त्रणमा लिइएको प्रहरीले जनाएको छ ।
पक्राउ पर्नेमा चैनपुर नगरपालिका–४, दोभानेका अग्नि भनिने सन्तोष तामाङसहित पाँचजना रहेका छन् । प्रहरीले उनिहरुको साथबाट विस्फोटक पदार्थ समेत बरामद गरेको छ ।
संखुवासभाका विभिन्न स्थानमा आगजनी र बम विस्फोट गराउनेको खोजी गर्नेक्रममा उनीहरुलाई चैनपुर नगरपालिका–१, गुफापोखरीबाट पक्राउ गरिएको प्रहरी नायव उपरीक्षक मिमबहादुर लामाले जानकारी दिनुभयो ।
उनीहरुको साथबाट रेडबुल बम, सकेट बम, विस्फोटमा प्रयोग हुने सेफ्टी फ्युजलगायत सामग्री बरामद गरिएको जनाइएको छ ।
यही फागुन २ गते पक्राउ परेका उनीहरुलाई प्रहरीले मंगलबार सार्वजनिक गरेको हो । पक्राउ परेकामाथि थप अनुसन्धान भइरहेको प्रहरीले जनाएको छ ।
