बाग्लुङ १८, भदौं । बागलुङको ढोरपाटन नगरपालिकाको भुजीखोलामा गए राती आएको बाढीमा परेर मृत्यु हुनेको संख्या १२ पुगेको छ । बाढीका कारण ४२ जना बेपत्ता भएका छन् । जिल्ला प्रहरी कार्यालय बागलुङका अनुसार दिउँसो सम्ममा ४२ जना बेपत्ता भएको र यो संख्या अझै थपिन सक्ने देखिएको छ ।
बिहानसम्म १३ जना बेपत्ता भएको जानकारी आए पनि प्रहरी र नेपाली सेनाको टोली घटनास्थलमा प्रत्यक्ष पुगेपछि तेब्बर बढी संख्यामा मानिस बेपत्ता भएको पाइएको जिल्ला प्रहरी कार्यालयका प्रहरी नायव उपरीक्षक राजेन्द्र रेग्मीले जानकारी दिनुभयो । राती करिब १२ बजे भूजीखोलामा आएको बाढीले ढोरपाटन वडा नम्बर ७, ८ र ९ का ३१ घर बगाएको छ । मृतकमध्ये पाँच जना पुरुष र एक बालिका सहित ८ जना महिला छन् ।
जसमा एक महिलाको भने सनाखत भएको छ । यसैबिच बाढी प्रभावित क्षेत्र ढोरपाटन नगरपालिकामा राहत सहित हिँड्नुभएका गृहमन्त्री रामबहादुर थापा बादल सहितको टोली बीच बाटोबाटै फिर्ता भएको छ । भुजीखोलामा बाढीले पु¥याएको क्षतिबारे स्थलगत जानकारी लिन नेपाली सेनाको हेलिकप्टर मार्फत उडेका गृहमन्त्री थापा मौमस खराबी पछि स्याङ्जाको आकाशबाटै पोखरा विमानस्थलमा आकस्मिक अवतरण गर्नुभएको थियो ।
