गोरखा, ११ मंसिर । गोरखा नगरपालिका वडा नं. १० छेवेटार बजारबाट लागुऔषध सहित २ जनालाई प्रहरीले नियन्त्रणमा लिएको छ । प्रहरील छेवेटारबजारका ३० बर्षिय अजय गुरुङ सहित २ जनालाई शनिबार पक्राउ गरिएको हो ।
पक्राउ परेकाहरुबाट नियन्त्रित लागूऔषध डाईजेपाम ५८ पिस, फेनारगन ५८ पिस, नोफिन ५८ पिस, नगद २८ हजार रुपैयाँ र मोबाईल ४ थान बरामद गरिएको जिल्ला प्रहरी कार्यालय गोरखामा प्रहरी नायव उपरिक्षक एवं सुचना अधिकारी लिलाराज लामिछानेले जानकारी दिनुभयो ।
विशेष सूचनाको आधारमा जिल्ला प्रहरी कार्यालय गोरखा र प्रहरी चौकी बाह्रकिलोबाट खटिएको प्रहरीले गुरुङको घरमा लुकाई छिपाई राखेको उक्त परिमाणको लागूऔषध फेला पारी पक्राउ गरिएको प्रहरीले जनाएको छ ।
पक्राउ परेकाहरुलाई आइतबार गोरखा जिल्ला अदालतबाट म्याद थप गरी अनुसन्धान थालिएको डिएसपी लामिछानेले बताउनुभयो ।
