गोरखा, ८ भदौ : गोरखामा तिजको दर खाएका एउटै गाउँका एक सयभन्दा बढी मानिस बिरामी परेका छन् । गोरखा नगरपालिका वडा नम्बर ७ स्थित मान्द्रेढुङ्काका स्थानीय महिला तथा पुरुष तिजको पूर्वसन्ध्यामा भोज खाएपछि बिरामी परेका वडाध्यक्ष बिष्णु श्रेष्ठले जानकारी दिनुभयो ।
भोज खाएका अघिकासं बिरामी परेको उहाँले बताउनुभयो ।
‘कृष्ण जन्म अष्टमीका दिन स्थानीय महिला तथा पुरुषहरु मिलेर तिजको दर खाएको र सोही साँझदेखि नै भोज खाएकाहरु सवै बिरामी परेका हुन्, वडाध्यक्ष श्रेष्ठले भन्नुभयो, ‘हिजोमात्र भोज खाएकाहरु बिरामी परेको थाहा पाएपछि स्वास्थ्यकर्मीहरुले लगेर उपचार सुरु गरिएको छ ।’
उहाँले स्वास्थ्यकर्मीको टोलीले ४० जना भन्दा बढीको स्वास्थ्य जाँच गराएको बताउनुभयो ।
चेकजाँच गराएका मध्ये ३ जनालाई स्लाइन पानी नै चढाउनुपर्ने अबस्थामा रहेको पाइएको वडाध्यक्ष श्रेष्ठले जानकारी दिनुभयो । बिरामीको घरघरमा स्वास्थ्यकर्मीको टोली पठाएर आबश्यक औषधी उपचार गरिएको उहाँले बताउनुभयो ।
बिरामी परेकाहरु अहिले बिस्तारै निको हुदै गएको स्वास्थ्यकर्मीको भनाई छ । केहीलाई अझै घरमा स्लाइन लगाएर राखिएको अहेव भूमिका श्रेष्ठले जानकारी दिनुभयो । बिरामीहरुमा शनिबार साँझदेखि नै पेट दुख्ने, वान्ता हुने, जरो आउने र पखाला लाग्ने समस्या देखिएको अहेव श्रेष्ठको भनाई छ ।
बिरामी भएका मध्ये अधिकांसको गोरखा सदरमुकाममा रहेको नीजि क्लिनिक र केही आफै गोरखा अस्पताल पुगेर उपचार गराइरहेको उहाँले बताउनुभयो । तिरको दरखाने कार्यक्रममा महिलाहरुसंगै पुरुषहरु पनि सहभागी भएका थिए । भोजमा पुलाउ, अचार, तरकारी र मासुको परिकार खाएका थिए । तर मासुका कारण बिरामी भएको अनुमान गरिएको छ ।
