गोरखा, ३१ साउन : गोरखामा मलामी गएका एक पुरुषलाई नदीले बगाएर बेपत्ता बनाएको छ । गोरखा नगरपालिका वडा नम्बर १३ स्थित रामशाहघाटमा पर्ने दरौंदी नदी र मस्याङदी नदीको भंगालोमा परेर मलामी एक पुरुष बेपत्ता हुनुभएको जिल्ला प्रहरी कार्यालय गोरखाका प्रहरी नायव उपरीक्षक लिलाराज लामिछानेले जानकारी दिनुभयो ।
बेपत्ता हुनेमा स्थानीयबासी ५५ बर्षका भुवनबहादुर अधिकारी रहेको उहाँको भनाई छ । शव जलाएर फर्कने बेला नदीमा मुख धुन भन्दै पसेका उहाँलाई नदी एक्कासी बगाएको प्रत्यक्षदर्शीको भनाई उदृत गर्दै प्रहरीले जनाएको छ । बेपत्ता अधिकारीको खोजीका लागि जिल्ला प्रशासन कार्यालय गोरखाको समन्वयमा चितवनको कुरिनटारमा रहेको बिपत ब्यवस्थापन तालिम शिक्षालयबाट गोताखेरको टोली परिचालन गरिएको जिल्ला प्रहरी कार्यालय डिएसपी लामिछानेले जानकारी दिनुभयो ।
बिहान करिब ११ बजेको घटना भएको लगत्तै नेपाल प्रहरी र सशत्र प्रहरीको गोताखोर टोलीले तनहुँको आँबुखैरेनीदेखी मुग्लीनको त्रिशुली नदी वरपर खोजी गरेको भएपनि फेला पार्न नसकिएको स्थानीयबासी रित्त बानियाँले जानकारी दिनुभयो ।
