गोरखा, १७ कात्तिक : गोरखामा आज साँझ ट्याक्टरबाट खसेर एक व्यक्तिको मृत्यु भएको छ । जिल्लाको गण्डकी गाउँपालिका वडा नम्बर ३ स्थित फुजेल तिवारी गाँउमा ट्याक्टरबाट खसेर सोही ठाउँका ५५ बर्षका प्रेमप्रसाद देवकोटाको मृत्यु भएको जिल्ला ट्राफिक प्रहरी कार्यालय गोरखाका प्रमुख प्रेमप्रसाद पोखरेलले जानकारी दिनुभयो ।
आमडाँडाबाट बेनीघाट तर्फ जाँदै गरेको ग १ त ४५८८ नम्बरको ट्याक्टरबाट खसेर देवकोटाको मृत्यु भएको उहाँले बताउनुभयो । एक्कासी ट्याक्टरबाट खसेका देवकोटाको टाउकोमा चक्काले किचेपछि घटनास्थलमै मृत्यु भएको प्रमुख पोखरेलले जानकारी दिनुभयो ।
तिहारका लागी मासु लिएर ट्याक्टर चढेर घर तर्फ फर्कदै गर्दा देवकोटा दुर्घटनामा पर्नुभएको हो । घटनालगत्तै ट्याक्टरका चालक ट्याक्टर छाडेर फरार भएका प्रहरीको भनाई छ । फरार चालकको खोजी भइरहेको जिल्ला प्रहरी कार्यालय गोरखाले जनाएको छ
